Resmi derekke sáikes, 21-25 qyrkúiek kúnderi aralyǵynda Batys Qazaqstan oblysyna 16 898 Resei azamaty kelgen. Reseilikterdiń údere kóshýinen Oralda jalǵa beriletin páter qalmaǵan. Alǵashqy kúnderi qaladaǵy Cinema Park kinoteatry olardy eki kún óz ǵimaratynda panalatty. Sondai-aq reseilikterdi "Atameken" balalar lageriniń aimaǵyna ornalastyrý týraly sheshim qabyldanǵany da belgili boldy. Bul jóninde Stan.kz aqparat agenttigi Moi gorod basylymyna silteme jasap habarlaidy.
Ǵimarat 200 adamǵa eseptelgen, biraq alǵashqy túni-aq 240 sheteldik qonystanǵan. Olardyń kópshiligi ásker jasyndaǵy er adamdar, aralarynda balaly áielder de bar. Kúnkóris quny - kúnine eki myń teńge. Bul tólemge tamaq aqysy kirmeidi.
37 jastaǵy Aleksandr – Voronej qalasynyń turǵyny. Ol Oralǵa Saratov arqyly ótken. Óziniń aitýynsha, Qazaqstanǵa alǵash ret kelgen jáne munda onyń týystary da, dostary da joq. Otanynda ata-anasy men barlyq múlki qalǵan. Er adam – túnde balalar lagerine qonystanǵandardyń biri.
"Áýeli Ozinkige jetip, 12 shaqyrym kezekke turyp, shekaraǵa deiin jaiaý júrip keldik, sosyn bekette turǵandarmen kelistik. Biz bul úshin 15 myń rýbl tóledik. Oralǵa kirgennen keiin eriktiler shaqyrǵan vokzal aýmaǵyna keldik. Olar bizdi ornalastyryp, tamaqtandyryp, jatyn oryn taýyp berdi. Barlyǵy keremet boldy, bárine alǵys aitqym keledi. Qazir páter jaldaýǵa bolatyn jerdi izdep júrmiz, biraq tabýymyz qiyn, sebebi Oralda barlyq jer lyq toly. Oralda qalýymyz ekitalai, Aqtóbeni nemese Astanany betke alamyz. Biraq bir bailamǵa áli kelmedik, biz kelise almai jatyrmyz, baǵalary bizdiń oiymyzsha, tym joǵary", – deidi Aleksandr.
Onyń sózinshe, Ýkrainada bolyp jatqan soǵys kezeńinde elde daǵdarys paida bolǵan, sonymen qatar ol eshqashan qolyna qarý ustap kórmegen azamattardy jappai jumyldyrýdy qate sheshim dep sanaidy.
"Bizdi ol jaqta naǵyz ólimniń qarsy aldyna aidap salady, meniń olai etkim kelmeidi", – dep túiindedi azamat.
Al Dmitrii áieli men qyzyn Voronejde qaldyryp ketken, er adam olardy keiinirek alyp ketýdi josparlap otyr.
"Bizge eshkim shabýyl jasaǵan joq, sol sebepti otandy qorǵaý týraly sóz bolýy aqylǵa syimaidy. Ne bolyp jatqany, ne úshin baratynymyz (soǵysqa) nemese kim úshin baratynymyz túsiniksiz. Voronej – shekaralas qala, qazir ol jerde bombadan qorǵanatyn oryndar daiyndalyp jatyr. Árine, qaýip bar, týystarymdy mindetti túrde alyp ketemin. Qazaqstan eń jaqyn el, munda jetý ońai. Osy jerde qalýdy kózdeimiz, turý úshin ruqsat qaǵazyn alamyz dep úmittenemiz. Mamandyǵym - programmist, basshylyq Qazaqstanda filial ashýdy josparlap otyr, jumyssyz qalmaimyn dep úmittenemin", – deidi Dmitrii.
Aleksei alty jasar ulymen Ýfadan kelip, shekarany Elek arqyly kesip ótken. Reseidegi úiinde áieli men kenje uly qalǵan. Azamat Oralda ýaqytsha turaqtaidy, ol Astanaǵa poiyzǵa bilet alyp qoiǵanyn aityp, keiin Germaniiaǵa ketýdi josparlap otyrǵanyn jetkizdi.
"Jergilikti eriktiler bizge kómektesip jatyr, biraq shekarada eriktilerdi qasymyzǵa jolatpaityn taksi júrgizýshileri bar, ózderi qyzmetteri úshin 24 000 teńge surady. Oralda alǵashqy kúndi meshitte ótkizdik, páter jaldaǵymyz keldi, biraq olar kúnine 10 myń rýblge deiin (85 myń teńge shamasynda – red.) surady. Munyń bári azdap qynjyltady, óitkeni biz merekege kelgen joqpyz, soǵystan qashyp jatyrmyz ǵoi. Biz ýkraindardy óltirgimiz kelmeidi, ózimizdiń de ólgimiz kelmeidi", – dep túsindirdi Aleksei.
"Atameken" balalar lageriniń ákimshiligi reseilikterdiń kelip jatqanyn, alaida bos oryndardyń joq ekenin ashyp aitty. Lagerdiń úsh mezgil qolaily baǵamen tamaq beretin ashanasy bar. Keshendi túski astyń baǵasy, mysaly úshin 1000 teńge.
"Biz kelgenderdiń barlyǵyn ornalastyrýǵa tyrysyp jatyrmyz. Keibir ketken adamdardyń ornyna basqa adamdardy alamyz. Qoldaryndaǵy bar qujattarmen tirkeimiz. Munda olardy kóshi-qon politsiiasy bekitedi. Turý aqysyn teńgemen de, rýblmen de qabyldai beremiz", – dedi ǵimarattyń ákimdik ókili Tilek Qýanyshkereev.
Eriktiler reseilikterdiń qonystanýyna kómektesedi, múmkindiginshe shekarada sheteldikterdi qarsy alyp, Oralǵa deiin tegin aparady.
"Azyq-túlikterdi ártúrli kompaniialar alyp keledi, al qarapaiym adamdar tamaq ákeledi. Bir jigit úshinshi kúni palaý pisirip, ony shekaraǵa aparyp, sheteldikterge ystyq tamaq usynyp júr. Kelgenderdiń basym kópshiligi eń birinshi uiyqtap, jylynǵysy keledi. Kópshiligi ýaqytsha kelgender, aralarynda turaqtap qalǵysy keletinder de bar. Biz sáikes baǵa boiynsha baspana izdei otyryp, páterlerdiń baǵasyn únemi qadaǵalap otyramyz", – dep qosty erikti Tatiana Kelaskina.
Al "Oraldaǵy orystarǵa kómek" Telegram-arnasyndaǵy jazbalarǵa qaraǵanda, kórshi memlekettiń turǵyndary qalaǵa áli de bolsa kóptep kelip jatyr. Shekaradan ótkisi keletinder táýlik boiy kezekte turady. BQO aýmaǵynda alty baqylaý-ótkizý beketi bolsa, oblys birden Resei Federatsiiasynyń bes oblysymen shektesetinin aita keteiik.
