«Otandastar qory» kommertsiialyq emes aktsionerlik qoǵamy shetelden kelip, bilim alýǵa niet bildirgen ári 1 000 oryndyq grantqa syimai qalǵan 238 ótinish berýshiniń máselesin sheshilýine yqpal etti. Bul týraly "Ult aqparat" «Otandastar qory» KEAQ baspasóz qyzmetine silteme jasap habarlaidy.
Aita keteiik, biyl shetelden kelgen qandas stýdentterdi daiyndyq kýrsyna qabyldaý emtihany 13 qyrkúiekte ótti. Al 25 qyrkúiekte talapkerler jinaǵan balyna qarai bólingen 1 000 orynǵa qabyldanǵan edi.
«Otandastar Qory» KEAQ 1000 orynǵa syimai qalǵan 238 ótinish berýshiniń jaiy boiynsha QR Bilim jáne ǵylym ministrligine hat joldady. Al Dúniejúzi qazaqtary qaýymdastyǵynyń birinshi orynbasary Zaýytbek Qaýysbekuly Úkimet otyrysynda osy máseleni kóterdi. Búgingi kúni másele oń sheshimin taýyp, 238 úmitker elde qalyp, bilimin tegin jalǵastyrýǵa múmkindik aldy», - delingen baspasóz baianynda.
Toqtala ketetin jait, shet elderde turatyn qandastarymyzdyń Qazaqstanda bilim alýy jyldan jylǵa júielenip keledi. Etnikalyq qazaq jastarynyń JOO-ǵa túsýi kezinde qazaq tili men Qazaqstan tarihy synaǵynan qinalmaýy úshin atalǵan oqý oryndarynda olarǵa arnalyp daiyndyq bólimderi ashylǵan. Otandastar qory bilim izdep kelgen shet eldik qazaq jastarynyń jataqhanamen qamtamasyz etilýine sep bolǵan edi.
