Búgin Aqordada birqatar tulǵalarǵa joǵary áskeri jáne arnaýly ataqtar, synyptyq shender jáne biliktilik synybyn tabystaǵan Elbasy Nursultan Nazarbaev olardy aldaǵy Otan qorǵaýshy kúni merekesimen quttyqtady, dep habarlaidy QazAqparat tilshisi.
«Qazaqstannyń Otan qorǵaýshy kúni dep 7 mamyrdy atadyq. 1992 jyly dál osy kúni qazaqtyń Qarýly Kúshterin qurý týraly Jarlyqqa qol qoiǵan bolatynmyn. Sondyqtan er-azamattardy, Otan qorǵaýshylardy bizdiń jubailarymyzdyń, ata-analarymyzdyń quttyqtaityn kúni dál sol kún. Esine sala bermesek, keide umytyp ketedi», - dep ázildedi Nursultan Nazarbaev.
Memleket basshysy ómirin áskeri qyzmetke arnap, jas kezinen bilim alyp, oqyp, temirtei tártipke múltiksiz baǵynatyn azamattardy kele jatqan merekelerimen quttyqtady.
«Osyndai eńbektiń arqasynda eń joǵary general ataǵyn alý úlken qýanysh dep bilemin. Osy qýanyshtaryńyz qutty bolsyn! Sizderdi, januialaryńyzdy, birge istegen jora-joldastaryńyzdy quttyqtaimyn!», - dedi Nursultan Nazarbaev.
Qazaqstan Prezidenti kelesi kezekte búgingi álemniń qubylmaly ekendigin basa aitty.
«Erteń, odan ary kúni ne bolaryn eshkim de bilmeidi. Degenmen, oq-dárini qurǵaq ustap, barlyq ýaqytta ázir bolý, Otanyń men jeriń úshin kez kelgen ýaqytta janyńdy pida etýge daiyn bolý qajet. Biz, barlyq er-azamattar sol úshin dúniege keldik jáne sol úshin ómir súremiz. Eger adamǵa ómir beriletin bolsa, birde ol ómir adammen qosh aitysady. Biz onyń qaida, qashan bolaryn bilmeimiz. Barlyq ýaqytta da jaýyngerler Otanyn qorǵaý jolynda janyn pida etýdi ózderiniń basty paryzy sanaǵan. Bul qarapaiym sóz emes», - dep atap ótti QR Prezidenti.
