Kúni keshe ǵana «Mádeniettaný» mamandyǵy boiynsha magistr diplomyn qorǵaǵan Meirambek Besbaev áleýmettik jelide óz atyna aitylyp jatqan syndarǵa jaýap berdi, dep habarlaidy "Ult aqparat".
«Qadirli, dostar! Ókinishke orai, bizdiń aramyzda qýanyshqa ortaqtasa almaityn, ishtarlyǵy bar adamdar da kezdesedi. Ózi ustaz, ózi jýrnalist-ǵalym Myrzantai Jaqyp degen aǵamyz Feisbýkte meni ǵalym bolyp bireýdiń ornyn tartyp alǵaly júrgen adamdai sipattapty. Meniń ónerde óz jolym bar. Eshkimniń jolyna da, qyzmetine de talasqan emespin. Bala kúnimnen mýzyka mektebinde oqydym. Ulttyq konservatoriiada bilimimdi jetildirip, T.Júrgenov atyndaǵy Teatr jáne óner akademiiasyn bitirdim. Jańa zaman talabyna sai sol oqyǵan bilimimdi damytý úshin «Mádeniettaný» mamandyǵy boiynsha magistratýrany jalǵastyrdym. Ekonomika, zań, fizika siiaqty basqa salany qýǵan joqpyn. El sóz qylmasyn dep ashyq dissertatsiia qorǵaýǵa da kelisim berdim. Kelgen adamdardyń bári qorǵaýdyń qalai ótkenin kózderimen kórdi. Túrkiianyń, Ázerbaijannyń elshiliginen de arnaiy ókilder qatysyp otyrdy. Óz salam boiynsha bilimimdi jetildirýge meniń de quqym bar dep oilaimyn. Keide osyndai sátterde kimniń dos, kimniń dushpan ekeni de belgili bolyp qalady. Men eshkimge jamandyq tilemeimin. Barshańyzǵa tek qýanysh tileimin», - dep jazdy Meirambek Besbaev Instagramdaǵy paraqshasynda.
Aita keteiik, Myrzantai Jaqyp Feisbýktegi paraqshasynda «Qazaqstan Respýblikasynyń Memlekettik qyzmet isteri jáne sybailas jemqorlyqqa qarsy is-qimyl agenttigi men Bilim jáne ǵylym ministrliginiń nazaryna!» dep post jariialaǵan bolatyn.
«Keiingi 6-7 jylda (2011 jyldan bastap) elimizdegi irgeli Ulttyq ýniversitetterdiń magistratýralary men PhD doktorantýralaryna memlekettik bilim granttary boiynsha oqýǵa túsip, magistrlik jáne doktorlyq jumystaryn qorǵap, akademiialyq jáne ǵylymi ataq-dárejeler alyp jatqan «ánshi-tele-juldyzdardyń», sondai-aq bilim jáne ǵylym salalaryna múldem qatysy joq basqa da azamattardyń aǵylshyn, ózge de shetel tilderinen emtihandardy qalai tapsyrǵanyna, jazǵan dissertatsiialaryna jáne otandyq, sheteldik ǵylymi jýrnaldarǵa jariialaǵan maqalalaryna resmi túrde arnaiy tekserý jumystaryn júrgizýlerińizdi suraimyn!», - dep jazǵan edi ol.
