QR Indýstriia jáne infraqurylymdyq damý birinshi vitse-ministri Qaiyrbek Óskenbaev aýyl turǵyndaryn aýyz sýmen qamtý kórsetkishi tómen óńirlerdi atady, dep habarlaidy QazAqparat.
«Memleket basshysy osy jyldyń 1 qyrkúiegindegi Joldaýynda 2025 jyly halyqtyń sapaly aýyz sýǵa qol jetimdiligin 100 paiyzǵa jetkizýdi tapsyrdy. Osy maqsatta, «Qýatty óńirler – eldi damytýdyń draiveri» Ulttyq jobasy aiasynda 2025 jyly atalǵan kórsetkishke qol jetkizý josparlanǵan. 2020 jyldyń qorytyndysynda elimizde sýmen jabdyqtaý qyzmetine qoljetimdilik 94,1 paiyzdy, onyń ishinde aýyldyq jerde – 90,1, al qalalarda 97,5 paiyzdy qurady. Osy jyldyń aýyldarda – 91,8, qalalarda 98 paiyzdyq josparly kórsetkishi oryndalady», - dedi ol Májilistegi dóńgelek ústel barysynda.
Onyń atap ótýinshe, elimizdiń keibir óńirlerinde aýyl turǵyndaryn sapaly aýyz sýmen qamtý kestesinen arta qalý baiqalady. Atap aiqanda, aýyl turǵyndaryn aýyz sýmen qamtýdaǵy eń tómengi kórsetkish Qostanai oblysynda - 64,7, Shyǵys Qazaqstan oblysynda - 81,4, Soltústik Qazaqstan oblysynda - 82,1 jáne Jambyl oblysynda 82,2 paiyzdy quraidy.
«Osyǵan orai qamtý kórsetkishi tómen óńirlerge basym negizde qarajat bólinedi. Bul arta qalyp qoiǵan óńirlerdiń kórsetkish deńgeiin arttyrýǵa múmkindik beredi. Sonymen qatar «Aýyl – el besigi» arnaýly jobasyna jáne óńirlerdi damytýdyń keshendi josparyna qosylǵan jobalalaryn qosylǵan aýyldarǵa basymdyq beriledi», - dedi Qaiyrbek Óskenbaev.
