Óskemende Ertistiń ústinen salynyp jatqan kópirdiń ekinshi bóligi iske qosyldy keshe. Jańa qurylys nysanynyń qoldanysqa beriler sátin taǵatsyzdana kútken kópshilik úshin bul jaǵymdy jańalyq boldy.
Esterińizge salsaq, Ertistiń oń jáne sol jaǵalaýyn jalǵaǵan kópir qurylysy bastalǵan kezde belgili bir merzimge kólikterdiń aryly-berili qatynasy toqtatylýy tiis edi. Alaida, bul jaǵdai qala turǵyndary men qonaqtaryna qolaisyzdyq týǵyzatynyn eskergen oblys ákimi Danial AHMETOV merdiger kompaniiaǵa qozǵalysty toqtatpaýǵa pármen berdi. Sonyń arqasynda qurylys jumystarymen birge eki baǵytta da máshineler aǵylyp júrip jatty.
– Kópirge jańa metall konstrýktsiialardy ornatyp bekitý, qozǵalys aýmaǵyn ulǵaitý jumystary 2014 jyldyń maýsymynda bastalǵan. Jumys 2016 jyly aiaqtalady dep josparlanǵan bolatyn. Alaida, keibir qarjylyq máselelerge bailanysty nysandy iske qosý merzimi sál shegerildi. Degenmen, ótkeldiń birinshi bóligi byltyr iske qosylsa, ekinshi bóligi biylǵy qarashanyń 4-i kúni ashyldy. Endigi jumys ortada turǵan eski kópirdi buzyp, ol jerge jańadan tireýler qoiylady. Sodan keiin 2017 jyldyń kókteminde kópirdiń eki bóligi biriktirilip, qurylys tolyq aiaqtalady, – deidi Óskemen qalalyq TÚKSh, jolaýshylar kóligi jáne avtomobil joldary bóliminiń basshysy Asqar Jaqsylyqov.
Bólim basshysynyń aitýynsha, kesheden bastap ondaǵy qozǵalys ózgergen. Aitalyq, oń jaǵalaýǵa baǵyt alǵan kólikter kópirdiń oń jaǵymen, iaǵni, sońynan iske qosylǵan bóligimen júrse, sol jaǵalaýǵa barǵysy keletinder burynǵydai qatynai beredi.
Serik Qumarǵaliuly, "Didar" gazeti
