Óskemen qalasynda joǵalyp ketken kámelettik jasqa tolmaǵan eki qyz tabyldy, dep habarlaidy "Ult aqparat".
Jasóspirimder úiiniń tárbielenýshileri Ananeva Arina Maksimovna men Kabanova Viktoriia Sergeevna 5 jeltoqsanda saǵat 19.30 shamasynda belgisiz baǵytta shyǵyp ketip, sol kúii qaityp oralmaǵan. Olardy qalalyq politsiia basqarmasynyń barlyq jeke quramy izdeýge kirisken bolatyn. Qazir eki qyz da aman-esen tabyldy.
«Eki saǵat buryn kámeletke tolmaǵan eki qyzdyń da qaida ekendigi anyqtaldy. Viktoriia Kabanova jasóspirimder úiine óz erkimen qaityp keldi. Sálden soń Óskemen qalalyq PB qyzmetkerleri Arina Ananevany tapqan. Alańdaýǵa negiz joq. Tárbielenýshilermen psiholog jumys júrgizýde. Olardyń ne sebepti ketip qalǵany anyqtalýda. Bei-jai qaramai, izdeýge atsalysqan barlyq azamattarǵa alǵys aitamyn», - dedi ShQO PD bastyǵy Saǵat Mádiev.
