Foto: Tengrinews.kz
Óskemende tamaqtyń himiialyq kúiigin resmi diagnoz dep taný usynyldy, - dep habarlaidy Tengrinews.kz tilshisi "Astana" telearnasyna silteme jasap.
Telearna málimetinshe, bul bastamany oblystyq Sybailas jemqorlyqqa qarsy kúres uiymy kótergen. Departament basshysy Denis Shákenov sybailas jemqorlyq táýekelderiniń kartasyn jasaý barysynda óńirdiń basty máselesi ekologiia ekeni anyqtalǵanyn aitady.
Shákenovtiń aitýynsha, zertteý jumystary kásiporyndardyń eskirgen jabdyqtardy paidalanatynyn, tazalaý júiesiniń tiimsiz ekenin kórsetken. Keletin janarmaidyń sapasyna da shaǵym kóp. Turǵyndardyń únemi kóterip júrgen basty máselesi - atmosferaǵa shyǵaryndylarǵa tikelei qatysty meditsinalyq diagnozdyń joqtyǵy.
"Densaýlyq saqtaý ministrligi tiisti em taǵaiyndaý úshin "tamaqtyń himiialyq kúiigi" degen resmi diagnoz qoiýy kerek. Óitkeni qazirgi tańda tamaǵyn kúiik shalǵan adamdar JRVI-men emdelip jatyr", - dedi Denis Shákenov.
Óskemen turǵyndary bul aýrýdy emdeý uzaqqa sozylmaýy úshin dereý durys em taǵaiyndaý mańyzdy dep sanaidy, óitkeni qalada tamaqtyń himiialyq kúiiginen zardap shekkender kóp.
