Foto: Tengrinews.kz
Óskemendegi sulýlyq salondarynyń birinde kózine blefaroplastika otasyn jasatqan áiel kóp uzamai kóz jumdy, dep habarlaidy Azattyq Ruhy.
«Sulýlyq salonyna 1962 jyly týǵan áiel kózine blefaroplastika jasaý úshin júgingen. Salon qyzmetkeriniń litsenziiasy jáne basqa da meditsinalyq qyzmetpen ainalysýǵa ruqsaty bolmaǵan. Biraz ýaqyttan keiin naýqas aýyryp, jedel túrde jansaqtaý bólimine jetkizilgen. Alaida ol esin jinamai qaitys boldy», - delingen qalalyq prokýratýra habarlamasynda.
Aldyn ala málimet boiynsha, áiel anafilaktikalyq shok alǵan.
Belgili bolǵandai, 16 sáýirde politsiia QR Qylmystyq kodeksiniń 322-babynyń 3-bóligi (Osy qyzmet túrine sertifikaty (nemese) litsenziiasy joq adamnyń meditsinalyq nemese farmatsevtikalyq qyzmetpen ainalysýy, eger bul abaisyzda adam ólimine ákep soqsa) boiynsha sotqa deiingi tergep-tekserýdi bastaǵan.
Aita keterligi, QR Qylmystyq kodeksiniń 322-babynyń 3-bóliginde qarastyrylǵan jaza boiynsha úsh jylǵa deiingi merzimge belgili bir laýazymdardy atqarý nemese belgili bir qyzmetpen ainalysý quqyǵynan aiyra otyryp, bes jylǵa deiingi merzimge bas bostandyǵyn shekteýdi ne sol merzimge bas bostandyǵynan aiyrýdy kózdeidi.
