"Orlan 2000" áýe kompaniiasynyń "AN-2" ushaǵy Óskemen áýejaiynan 1,5 shaqyrym jerde shuǵyl qondy. Ushaq bortynda 5 adam bolǵan, eshkim zardap shekken joq.
Qazaqstannyń aviatsiialyq ákimshiliginiń baspasóz qyzmetiniń málimetinshe, áýe kemesi Óskemen – Aqsýat baǵyty boiynsha sanitarlyq tapsyrmany oryndaý úshin kókke kóterilgen.
Jergilikti ýaqytpen saǵat 12:50-de ekipaj músheleri qozǵaltqyshtaǵy tótenshe jaǵdai týraly habarlaidy.
"Áýe kemesiniń komandiri Óskemen áýejaiynan 1,5 shaqyrym qashyqtyqta ushaqty qondyrý jóninde sheshim qabyldady. Bortta 5 adam boldy - 3 ekipaj múshesi men 2 jolaýshy. Zardap shekkender joq", - delingen vedomstvonyń baspasóz málimdemesinde.
Al tótenshe jaǵdailar komiteti taratqan málimetke súiensek, oqiǵa Praporshikovo aýylynan 10 shaqyrym jerde bolǵan. AN-2 ushaǵynyń qozǵaltqyshynan aqaý shyǵyp, ol áýejai mańynda shuǵyl túrde qonady. Bir ushqyshqa meditsinalyq kómek kórsetildi. Oqiǵanyń jai-japsary tekserilip jatyr.
Qazirgi kezde indýstriia jáne infraqurylymdyq damý ministrliginiń aviatsiialyq oqiǵalardy tekserý basqarmasy tergeý jumystaryn bastady.
