Óskemen qalasyndaǵy Olga Rypakova atyndaǵy jeńil atletika manejindegi bapker Pavel Kýkin óńirde jeńil atletikanyń qalai damyp jatqanyn aityp berdi, dep habarlaidy "QazAqparat".
«O.Rypakova atyndaǵy jeńil atletika manejinde bapker bolyp eńbek etip júrgenime 8 jyldai boldy. Osy ýaqyt kóleminde jastardy bul sport túrine baýlyp, kórgen-bilgenimdi úiretip kelemin. Jalpy óńirimizde jeńil atletika jaqsy qarqynmen damyp kele jatyr deýge bolady. Jerlesimiz Olimpiada chempiony atanǵannan keiin oblysta osy baǵytqa kóp kóńil bóline bastady», - deidi Pavel Kýkin.
Onyń aitýynsha, aimaqta sportshylardy daiyndaýǵa múmkindik beretin jaqsy baza qalyptasqan. Manejde jeńil atletter qajetti jattyǵýlardyń barlyǵyn jasai alady.
«Endi bir ashyq alańda stadion bolsa deimiz. Qazir qaladaǵy «Shyǵys» stadionynda rekonstrýktsiialaý jumystary júrgizilip jatyr. Bári oidaǵydai bolsa, sol jaqta jattyǵýǵa múmkindik alsaq dep otyrmyz. Sondai-aq oblysta jasóspirimder sportyna erekshe nazar aýdarylǵan. Bolashaǵynan zor úmit kúttiretin jas sportshylarymyz respýblikalyq, aziialyq básekelerde biik shyńdardan kórinip júr. Sondyqtan Shyǵys Qazaqstanda jeńil atletika turalap qaldy deýge esh negiz joq», - deidi bapker.
Óskemendegi jeńil atletika manejinde 600-ge jýyq bala jattyǵady. Alaida koronavirýs pandemiiasy bastalǵaly beri olardyń sany birshama azaiyp ketken.
«Úiirmege 9-10 jastaǵy balalar qabyldanady. Bapkerler olardy sabaq kestelerine sáikes birneshe topqa bólip daiyndaidy. Al boiynda erekshe qabileti barlardy jáne jaqsy nátije kórsetkenderdi bólek iriktep, jeke daiyndyq kestesin quramyz», - dedi Pavel Kýkin.
