Óskemen qalasynda 18 jáne 19 jastaǵy eki turǵynnan asa iri kólemdegi esirtki tárkilendi, dep habarlaidy ult.kz.
Shyǵys Qazaqstan oblysy politsiia departamentiniń baspasóz qyzmetiniń málimetinshe, kúdiktiler «Qarasora-2026» respýblikalyq jedel aldyn alý is-sharasy aiasynda ustalǵan.
Politsiia málimetinshe, olar aldyn ala sóz bailasyp, esirtki zattaryn ótkizý maqsatynda zańsyz saqtady degen kúdikke ilingen. Jeke tintý barysynda olardan tyiym salynǵan zattar salynǵan 91 orama tárkilendi.
Saraptama qorytyndysy boiynsha tárkilengen zattardyń quramynan 25,29 gramm mefedron, 27,21 gramm α-PVP psihotroptyq zaty jáne 6,24 gramm kannabis shaiyry anyqtalǵan.
Vedomstvonyń málimetinshe, tárkilengen esirtkiniń jalpy kólemi zańnamaǵa sáikes asa iri mólsher bolyp esepteledi.
Atalǵan fakti boiynsha sotqa deiingi tergeý júrgizilip jatyr. Kúdiktilerdiń biri eshqaida ketpeý týraly qolhatpen bosatylsa, ekinshisi ýaqytsha ustaý izoliatoryna qamaldy.
