Óskemen qalasynda aýqymdy rekonstrýktsiialaý jumystary júrgizilgen áýejai qaita ashyldy, dep habarlaidy "Ult aqparat" QazAqparat agenttigine silteme jasap.
ShQO Aqparat ortalyǵynyń málimetine súiensek, sońǵy 5 ai boiy jabyq turǵan Óskemen áýejaiy 1 qazanda óz jumysyn bastaǵan. Tańerteńnen áýejaidan Almaty men Nur-Sultan qalalaryna ushaqtar ushty.
«Nurly jol» memlekettik baǵdarlamasy aiasynda ushý-qoný jolaǵy kúrdeli jóndeýden ótti. Sondai-aq jolaqty uzartý jáne keńeitý boiynsha jumystar júrgizilgen.
«Merdigerler ushý-qoný jolaǵyndaǵy asfaltbeton jamylǵysyn tolyǵymen aýystyryp, ony birshama ulǵaitty. Endi uzyndyǵy 2800 metr, eni 60 metrdi quraidy. Mundai parametrler áýejaiǵa iri halyqaralyq reisterdi qabyldaýǵa múmkindik beredi. Ushý-qoný jolaǵyn jaryqtandyratyn jabdyqtardyń jańa zamanaýi júiesiniń ornatylýy da asa mańyzdy bolyp otyr», - dedi «Óskemen áýejaiy» AQ prezidenti Nikolai Korolenko.
Onyń aitýynsha, áýe ailaǵynda mundai aýqymdy jumystar sońǵy ret 1996 jyly júrgizilgen.
