Óskemen qalasynyń ákimi Qýat Tumabaev oblys basshysy Danial Ahmetovtiń synynan keiin qyzmetinen ketti, dep habarlaidy "Ult aqparat".
Ridderdegi bozbalanyń ólimine ákep soqtyrǵan kólik apatyna qatysy bar delingen qala basshysy resmi túrde ózin qyzmetinen bosatý týraly ótinish jazǵany málim boldy. Odan sál buryn Qýat Tumabaev óziniń «Feisbýk» paraqshasynda Óskemennen Semei qalasyna shyǵa beristegi Qabanbai batyr eskertkishiniń sýretin salyp, «Saǵan áli kelermin» dep jazǵan bolatyn.
Birneshe kún buryn oblys ákimi Danial Ahmetov shahar basshysyna qyzmetten óz erkimen ketýdi usynǵan edi.
«Menińshe, Qýat Tumabaevtyń osyndai joǵary laýazymda otyrýǵa moraldyq quqyǵy joq. Men oǵan óz erkimen jumystan ketý týraly aryz jazýdy usyndym» - degen Danial Ahmetov.
Aita keteiik, 2018 jyldyń 15 sáýirinde Qýat Tumabaev Ridderde adam qaqqan sheneýniktiń kóliginde bolǵan. Keiin ol sot aldynda jol apatynyń kýágeri retinde jaýap bergen. Al Memlekettik qyzmet isteri jáne sybailas jemqorlyqqa qarsy is-qimyl departamentiniń etika jónindegi keńesi Óskemenniń eks-ákimin qyzmetine tolyqtai sáikes emes degen málimdeme jasaǵan.
«Qýat Tumabaev 13 tamyz kúni ózin qyzmetinen bosatý týraly ótinish jazdy. Onyń laýazymynan bosatylýy Qazaqstan Respýblikasy Prezidentiniń 2002 jylǵy 29 naýryzda shyqqan «Memlekettik bilik organdary júiesindegi kadrlyq saiasattyń keibir máseleleri týraly» №828 jarlyǵy negizinde oryn aldy, - deidi ShQO ákiminiń baspasóz qyzmeti.
Qazir qala ákiminiń mindetin orynbasary Olga Býlavkina atqarýda.
