QR Mádeniet jáne sport ministrligi tapsyrysy boiynsha "Qazaqfilm", "Novyi mir" jáne Sataifilm kompaniialary birlese túsirgen "Anaǵa aparar jol" AQSh-tyń birneshe qalasynda kórsetiledi. Qazaqstandyq kinotýyndy Los-Andjeles, Hartford, Hiýston jáne Neshvill qalalaryndaǵy kórermenge jol tartpaq.
Amerikalyq prokattan keiin (90 kún ótken soń) bul filmdi Netflix kompaniiasynyń striming-platformasy jáne VOD tsifrlyq taralymy arqyly tamashalaýǵa bolady, dep habarlaidy "Qazaqfilmniń" baspasóz qyzmeti.
"Bizdiń filmniń AQSh kinoteatrlarynda kórsetiletini prodiýserler, túsirilim tobymyz jáne men úshin úlken abyroi. World Wide Motion Pictures Corporation kompaniiasy filmimizden shynaiylyqty kórip, ondaǵy oqiǵa jelisi álemniń barlyq aýditoriiasyna túsinikti bolatynyna senim bildirgenine qýanyp otyrmyn", - dedi rejisser Aqan Sataev.
"Anaǵa aparar jol" filminiń AQSh-taǵy distribiýtsiiasymen amerikalyq World Wide Motion Pictures Corporation kompaniiasy ainalysady. 1977 jyly negizi qalanǵan bul kompaniia kórkem, derekti, qysqametrajdy filmderdi jáne televiziialyq jobalardy qarjylandyryp qana qoimai, olardy óndiriske jiberip, tipti prokatqa shyǵarýǵa kómektesedi.
"Birneshe urpaqtyń tarihyn baiandaityn, "Oskar" premiiasyna usynylǵan tereń dramany prokatqa shyǵarý - bizdiń kompaniia úshin úlken maqtanysh. Amerikalyqtar, ásirese, analar qaýymy janǵa jylý syilaityn filmderdi qýana kóredi", - dedi World Wide Motion Pictures Corporation kompaniiasynyń bas direktory Pol Henkok.
Eske sala ketsek, "Anaǵa aparar jol" filmi "Úzdik shetel filmi" atalymynda Qazaqstan atynan "Oskar" jáne "Altyn globýs" premiialaryna usynylǵan bolatyn.
Tarihi kinotýyndynyń bas prodiýseri - Áliia Nazarbaeva, rejisseri - Aqan Sataev. Filmge elimizdiń tanymal akterleri Altynai Nógerbek, Ádil Ahmetov, Arýjan Jazylbekova, Berik Aitjanov, Bolat Ábdilmanov túsken. "Anaǵa aparar jol" qazaq otbasynyń 1930 jyldardan bastap búgingi kúnge deiin bastan keshken oqiǵalary jaily baiandaidy.
Filmniń tusaýkeseri 38-shi Halyqaralyq Máskeý kinofestivalinde ótti. Ol synshylardyń oń baǵasyn alyp, túrli kinofestivalde júldege ie boldy. Halyqaralyq kórsetilimderi ótken.
