Ortalyq sailaý komissiiasy QR Prezidenttigine kandidat Sádi-Bek Túgeldiń Konstitýtsiiada jáne «Qazaqstan Respýblikasyndaǵy sailaý týraly» Konstitýtsiialyq zańynda qoiylǵan talaptarǵa sáikestigin anyqtaý týraly qaýly qabyldady, dep habarlaidy "Ult aqparat".
Qaýly jobasyn usynǵan QR Ortalyq sailaý komissiiasynyń múshesi Baqyt Meldeshev 2019 jyldyń 22 sáýirinde «Qazaqstan Respýblikasyndaǵy sailaý týraly» QR Konstitýtsiialyq zańynyń 55-babyna sáikes, «Uly dala qyrandary» respýblikalyq qoǵamdyq mádeni-áleýmettik birlestigi Sádi-Bek Túgeldi prezidenttikke kandidat retinde usynýyna bailanysty onyń tiisti qujattaryn QR Ortalyq sailaý komissiiasyna usynǵanyn eske saldy.
Ortalyq sailaý komissiiasy kandidat Sádi-Bek Túgeldiń Konstitýtsiiada jáne «Qazaqstan Respýblikasyndaǵy sailaý týraly» Konstitýtsiialyq zańda belgilengen talaptarǵa sáikestigin tekserýge járdemdesýi úshin ýákiletti memlekettik organdarǵa suraý saldy jáne tiisti málimetter aldy.
2019 jyldyń 24 sáýirinde QR Ortalyq sailaý komissiiasynda Sádi-Bek Túgeldiń memlekettik tildi erkin meńgergenin anyqtaý jóninde lingvistikalyq komissiianyń otyrysy ótti jáne komissiia úmitkerdiń memlekettik tildi erkin meńgergeni jóninde sheshim qabyldady.
Sonymen birge, Ortalyq sailaý komissiiasy Ishki ister ministrliginiń Kóshi-qon qyzmeti komitetiniń málimetteri negizinde Sádi-Bek Túgeldiń Qazaqstanda týǵanyn, QR azamaty ekenin, sońǵy 15 jylda Qazaqstanda turǵanyn anyqtady. Onyń joǵary bilimi bar, sottalmaǵan, sybailas jemqorlyq boiynsha jaýapqa tartylmaǵan, belsendi sailaý quqyǵyna ie jáne memlekettik qyzmette jáne sailanbaly laýazymdarda keminde 5 jyl jumys tájiribesi bar.
QR OSK qabyldaǵan qaýlynyń 1-tarmaǵynda úmitker Sádi-Bek Túgeldiń QR Konstitýtsiiasyna jáne «Qazaqstan Respýblikasyndaǵy sailaý týraly» QR Zańynda qoiylǵan talaptarǵa sai keletini aitylǵan.
Ekinshi tarmaqta oblystardyń, respýblikalyq mańyzy bar qalalardyń, Qazaqstan Respýblikasy astanasynyń sailaý komissiialaryna Qazaqstan Respýblikasynyń Prezidenttigine kandidatty qoldap qol jinaýǵa arnalǵan qol qoiý paraqtaryn Sádi-Bek Túgelge berý tapsyrylǵan.
