«Ashyq dialog» suhbatynda QR Prezidenti Ákimshiligi basshysynyń birinshi orynbasary Dáýren Abaev kórneki aqparattyń memlekettik tilde jazylýyn retteitin zań jobasy týraly pikir bildirdi, dep habarlaidy QazAqparat.
Suhbat barysynda júrgizýshi Reseidiń keibir aqparat quraldarynyń QR Parlamenti Májilisiniń depýtattary bastamasymen qolǵa alynǵan zań jobasyna shúiligip jatqanyn aityp, Prezident Ákimshiligi basshysynyń birinshi orynbasarynan osy týraly pikirin surady.
«Keibir reseilik BAQ-ta atalǵan zań jobasy birjaqty berilgenin aitý kerek. Men tipti manipýliativti der edim. Mysaly, keibir basylymdardyń taqyrybynda «Qazaqstan orys tiliniń kórneki qoldanysynan arylyp jatyr» dep aitylǵan. Maǵynasyna qarasań, biz orys tilin kórneki jarnamada qoldanýǵa tyiym salatyn zań qabyldap jatqan siiaqtymyz. Eń renishtisi, adamdardyń kóbi osy qate taqyryptan ári qarai kirip oqymai, osy qate taqyryp boiynsha oi túiedi. Is júzinde orys tilin eshkim qoldanystan alyp jatqan joq. Biz tek qazaq tiliniń qoldanysyn mindetti etip jatyrmyz. Kórneki aqparat eki nemese úsh tilde ilinse de eshqandai problema joq», - dedi Dáýren Abaev.
Suhbat berýshi depýtattardyń mundai bastamany nelikten kótergenin de túsindirdi.
«Bizdiń depýtattar nege bul máselege bas qatyrǵanyn bilesiz be? Óitkeni kórneki jarnamada, tipti meiramhanalardyń mázirinde qazaq tili ne múlde qoldanylmaidy, ne qate qoldanylyp júr. Qate órip júredi. Internet ataýlar men tirkesterdi qazaqshaǵa tikelei, kalkamen aýdarǵan mánsiz mátinder týraly «memderge» tolyp ketti. Sondyqtan zań jobasynda dálme-dál aýdarma jáne durys jazý normasy týraly talap engizý qarastyrylǵan», - dedi Prezident Ákimshiligi basshysynyń birinshi orynbasary.
Onyń aitýynsha, atalǵan Zań jobasynyń taǵy bir qyry bar.
«Bul – eldi mekenderdiń atyn tarihi negizge súienip durys jazý. Mysaly, «Úlgi aýyly» degendi orys tiline aýdaryp, «selo Primernoe» dep aýdarýǵa kelmeidi. Odan da soraqy etip «Ýlga» dep jazýǵa múlde bolmaidy. «Úlgi» degen túpnegiz saqtalýy kerek. Al «Novoalekseevka» degen eldi mekenniń aty qazaq tilinde de «Novoalekseevka» bolyp jazylady, «Jańa Alekseevka» aýyly emes. Bul toponomika men tildik normany tártipke keltirý ǵana. Qazir orys tiliniń kórneki qoldanysynda eshqandai problema joq. Al qazaq tilinde, ókinishke qarai, ondai problema bar. Biz ony túzetýimiz kerek. Muny biz memlekettik tildiń qoldanysyn neǵurlym sapaly baqylaý arqyly iske asyramyz. Sondyqtan oryssyzdandyrý týraly áńgime joq. Biz tek memlekettik tildiń durys, sapaly qoldanysy úshin, halyqtyń oǵan qurmetpen qaraýy úshin kúresip jatyrmyz», - dedi Dáýren Abaev.
