Nur-Sultan qalasynyń ákimi Altai Kólginov astanalyq energetikterdiń jumysyn synǵa aldy, dep habarlaidy elorda ákiminiń resmi saity.
Kólginov JES-2-de bolyp, Nur-Sultandy gazdandyrý boiynsha kóshpeli jiyn ótkizdi. Keńes barysynda jobalyq-smetalyq qujattamanyń bir bóligi daiyn emes ekeni anyqtaldy.
"Saraptama áli ótpegen. Qazir konkýrs boiynsha sot otyrysy júrip jatyr. Keibir jobalar boiynsha áli kúnge deiin konkýrs jariialanbapty. Bul jaýapty qurylymdar arasynda ózara kelisimniń joqtyǵynan bolyp otyr. Oryndaýshylarǵa qaraǵanda bastyqtar kóp", - delingen ákimdik saityndaǵy habarlamada.
Jiyn barysynda aldaǵy jylytý maýsymyna kómir jetkizý, "Astana-Energiia" AQ balansyna "JES-1 jáne JEO-2 keńeitý jáne qaita qurý" jobasy aiasynda salynǵan jabdyqtardy berý talqylandy.
Astana jylý elektr stantsiiasyn gazdandyrýdyń 2019-2021 jyldarǵa josparlanǵan birinshi kezeńinde qalany 633,67 million kýb metr gazben qamtý kózdelgen, bul - elordadaǵy jalpy gaz tutyný kóleminiń 96 protsenti.
Aita ketsek, jylý berý maýsymynda barlyq qazandyqtyń jumys isteýine bailanysty jabdyqtar jóndelmeitin bolady. Sondai-aq qorshaǵan ortaǵa ziiandy zattardyń shyǵarylýyn qysqartý maqsatynda sharalar atqarýǵa tapsyrma berildi
"JES-1 jáne JEO-2 - elordanyń tynys-tirshiligin qamtamasyz etetin strategiialyq nysandar. "Astana-Energiia" AQ basshylyǵy barlyq kelisilmegen máseleni shuǵyl sheshýi qajet. Biz jylý elektr ortalyǵyn gaz qabyldaýǵa daiyndaýymyz kerek. Tiisti bólimsheler apta saiyn atqarylǵan jumys týraly esep berýi tiis", - dedi ákim.
