Almaty oblysy Kegen aýdanyndaǵy taýly aýmaqtan denesi órtengen kúide tabylǵan 37 jastaǵy politsiia qyzmetkeri Aslan Álserovtiń ólimi qoǵamda úlken rezonans týdyrdy. Qazir qylmystyq is boiynsha tergeý jalǵasyp jatyr, dep habarlaidy ult.kz.
Belgili bolǵandai, osydan eki jyl buryn Álserovter otbasy «Qaiyrly tań Qazaqstan» baǵdarlamasyna qatysyp, jeti balany tárbielep otyrǵan úlgili politsiia januiasy retinde kópshilikke tanystyrylǵan edi. Erli-zaiypty efirde tanysý tarihyn, otbasylyq qundylyqtaryn jáne bala tárbiesine qatysty ustanymdaryn bólisken bolatyn.
Baǵdarlama barysynda Aslan Álserov ishki ister salasyndaǵy eńbek jolyn 2008 jyly Almaty qalasynyń patrýldik politsiiasynda bastaǵanyn, al bolashaq jary Arailymmen qyzmet kezinde tanysqanyn aitqan. Óz kezeginde jubaiy ony sabyrly ári baisaldy minezi úshin tańdaǵanyn jetkizgen.
Otbasy sportty ómir saltyna ainaldyrǵanyn da jasyrmaǵan. Aslan grek-rim kúresimen ainalyssa, Arailym Álserova djiý-djitsýdan Qazaqstannyń alty dúrkin chempiony ekenin aitqan. Balalarynyń da túrli sport túrlerimen ainalysyp, halyqaralyq jarystarda jetistikke jetkeni sóz bolǵan.
Alaida arada eki jyl ótken soń syrt kózge úlgili kóringen otbasynyń taǵdyry kútpegen baǵytqa ózgerdi. Tergeý málimetinshe, qylmys Almaty qalasynda jasalyp, keiin máiit Almaty oblysynyń Kegen aýdanyndaǵy taýly jerge jetkizilgen bolýy múmkin. Is boiynsha marqumnyń jubaiy, kámeletke tolmaǵan uly jáne taǵy birneshe adam kúdikke ilindi. Keiin jasóspirim kúdiktilerge úiqamaq túrindegi bultartpaý sharasy qoldanyldy.
Osy iske qatysty Aslan Álserovpen birge qyzmet etken burynǵy áriptesi (aty ózgertilgen Jiger) onyń kásibi biliktiligi joǵary bolǵanyn aitty. Onyń sózinshe, áriptesteri arasynda marqumdy kóbine «Basar» nemese «Slepoi» dep ataǵan.
«Ol páter urlyǵy boiynsha isterdi ashýda óte tájiribeli maman edi. Qaladaǵy eń myqty jedel ýákilderdiń biri sanalatyn. Qyzmet barysynda birneshe ret shabýylǵa ushyrap, pyshaq jaraqatyn alǵan, oq tigen, jaq súiegi men murny synǵan jaǵdailar da bolǵan», – deidi burynǵy áriptesi.
Sondai-aq ol Aslan Álserovtiń sportqa erekshe mán bergenin, ózin ǵana emes, balalaryn da osy baǵytta tárbielegenin atap ótti. Aitýynsha, onyń úlken uly djiý-djitsýdan Aziia chempiony atansa, basqa balalary da sportpen belsendi ainalysqan.
Qazir atalǵan qylmystyq is boiynsha tergeý amaldary jalǵasyp jatyr. Quqyq qorǵaý organdary istiń barlyq mán-jaiyn anyqtap jatyr.
