Foto: pexels.com
Ulttyq kinony qoldaý memlekettik ortalyǵy 2023 jyly qarjylandyrýǵa úmitker kinojobalardy irikteý úshin konkýrsty qaita jariialaidy. Mundai sheshim aýditorlyq tekserý qorytyndysy boiynsha bekitildi, dep habarlaidy "Ult aqparat" ortalyqtyń baspasóz qyzmetine silteme jasap.
"Buǵan deiin jariialanǵan konkýrstyq ótinimderdi qabyldaý nátijeleri jaramsyz dep tanyldy.
Jańa konkýrsqa úmitkerlerdiń qujattary 9-29 tamyz aralyǵynda qabyldanady. Kinojobalardy qorǵaý, iaǵni Saraptamalyq keńes otyrysy qyrkúiek aiynyń sońynda ótedi" - delingen habarlamada.
Al konkýrstyq irikteýdiń qorytyndysy biyl qazan aiynda jariialanbaq.
«Biz memlekettik qarjy esebinen túsirilip, keiin «ulttyq film» dep tanylatyn jobalar týraly aityp otyrmyz. Sondyqtan tekserý júrgizgen aýditorlardyń usynystary men sheshimin eskerý jáne oryndaý kerek. Eń aldymen, barlyq rásimderdiń ashyqtyǵyn qamtamasyz etip, sybailas jemqorlyq táýekelderin barynsha boldyrmaý qajet. Kino qaýymdastyǵy naryqty damytý men sapany arttyrý úshin birigip jumys isteýi kerek. Eshqandai intriga qajet emes. Biz óz tarapymyzdan úmitkerlerge barynsha kómektesýge ári kinojobalarǵa aqparattyq qoldaý kórsetýge daiynbyz. Ortalyq ta, kinogerler de ár teńge úshin esep beretinin este ustaǵany jón», – dedi Ulttyq kinony qoldaý memlekettik ortalyǵy basqarma tóraǵasy Qurmanbek Jumaǵali.
