Ortalyq Aziiada iadrolyq qarýdan azat aimaqtyń qurylýy korei túbegine úlgi bola alady. Bul týraly «Ortalyq Aziia - Ońtústik Koreia» 12-forýmynda QR Syrtqy ister ministri Muhtar Tileýberdi aitty, dep habarlaidy QazAqparat.
«Korei túbegindegi oń ózgeristerdi de baiqap otyrmyz. Qazaqstan korei túbegindegi «beibit protsesti» jáne Seýldiń koreiaralyq qatynastardy damytý ári óńirdegi shielenisti tómendetý saiasatyn qoldaidy. AQSh pen KHDR arasynda 2018 jáne 2019 jyldary ótken sammitter taraptardyń ashyq teketires pen ózara aiyptaý dáýirin aiaqtaýǵa nietti ekendigin kórsetedi. Sonymen qatar Qazaqstan da KHDR-diń iadrolyq máseleleri tóńiregindegi aǵymdyq problemalardy qyzyǵýshylyq tanytatyn barlyq taraptyń múddelerin eskere otyryp, dialog arqyly beibit jolmen ǵana retteýge bolady dep sanaidy», - dedi Muhtar Tileýberdi.
Osy oraida ministr Qazaqstan úshin iadrolyq qarýdan azat beibitshilikke qol jetkizý basty basymdyq sanalatyndyǵyn basa aitty.
«Qazirgi álemde qarýdyń osynaý túrine ielik etý keide ústemdiktiń kórsetkishi bolyp sanalmaidy. Qaita jahandyq qaýipsizdikke qater tóndirip, halyqaralyq qoǵamdastyqpen yntymaqtastyqqa kedergi týdyrady. Osyǵan orai Ortalyq Aziiada iadrolyq qarýdan azat biregei aimaqtyń qurylýy korei túbegi óńiri úshin de úlgi qyzmetin atqara alady», - dedi ministr.
Aita keteiik, sharaǵa Qazaqstan, Ózbekstan, Qyrǵyzstan, Tájikstan, Ońtústik Koreia Syrtqy ister ministrleri qatysýda. Al Túrikmenstan tarapynan Qazaqstandaǵy Elshisi kelgen.
