© Press-slýjba MChS RF
Ridder qalasynda orman órtine qatysty is qaraldy. Káýap jasaǵan er adamnyń kesirinen turǵyn úiler órtenip, eki adam qaza tapty, dep habarlaidy Sputnik Qazaqstan "Astana" arnasyna siltem jasap.
Tótenshe jaǵdai biyl 10 mamyrda bolǵan. Orman órti 300 gektarǵa tarap ketti. Tutas bir shaǵyn aýdannyń turǵyndaryn qaýipsiz jerge kóshirýge týra keldi. Órt sóndirýshiler eki kún boiy tilsiz jaýmen arpalysty. Aviatsiiany kómekke shaqyrýǵa týra keldi. Ondaǵan úi janyp ketti, eki adam qaza tapty.
Al politseiler kináli adamdy tapty. 36 jastaǵy er adam otbasymen birge tabiǵatqa shyǵyp, káýap pisirgen. Shoq jerge túsip, órt shyqqan. Er adam ony ózi sóndirip kórgen. Biraq kúshi jetpeitinin túsingennen keiin oqiǵa ornynan qashyp ketken. Adamdar onyń kelip-ketkenin kórgen. Er adamdy ustaý kezinde mangal zattai aiǵaq retinde tárkilendi.
Sot sheshimimen ol eki jylǵa bas bostandyǵynan aiyryldy. Sýdia asyraýynda kishkentai balasy bar ekenin de eskerdi. Oǵan qosa, zardap shekken adamdarǵa 125 million teńgeni bólip tóleýge mindetteldi. Quqyq qorǵaýshylar aiyppuldy "oiǵa qonymsyz" shara dep otyr.
"125 million teńgeni zardap shekkenderge berý kerek eken, múmkin emes qoi. Sebebi adam bas bostandyǵynan aiyrý mekemesinde otyrǵanda kóp jaǵdaida jumyssyz bolady. Al odan shyqqannan keiin tabysynyń jartysyn berip otyrǵan kúnniń ózinde ómir boiy aiyppul tólep ótedi. Ony tolyǵymen tólep úlgermeýi de múmkin", - deidi zańger Aleksei Bojko.
Sottalýshy appeliatsiiaǵa shaǵym túsire alady. Al órt saldarynan zardap shekkenderge jańa baspana berildi.
