Elimizde orman sharýashylyǵy jáne janýarlar dúniesi qyzmetkerleriniń jalaqysy kóteriledi. Bul jaiynda QR Premer-Ministriniń orynbasary Roman Skliardyń Májilis depýtattarynyń saýalyna bergen jaýabynda aitylǵan, dep habarlaidy QazAqparat.
«Respýblikalyq biýdjet júktemesin tómendetý, ormandardy qorǵaý máselesinde jergilikti atqarýshy organdardyń jaýapkershiligin arttyrý maqsatynda 2002 jyly oblys ákimdikteriniń jedel basqarýyna orman jáne janýarlar dúniesin qorǵaý jónindegi 124 memlekettik mekeme berilgen bolatyn. Qazirgi ýaqytta erekshe qorǵalatyn tabiǵi aýmaqtar memlekettik orman sharýashylyǵy mekemeleriniń bazasynda jańa orman sharýashylyqtarynyń qurylýyna bailanysty oblys ákimdikteriniń qaraýynda 120 orman sharýashylyǵy bar. Olarǵa 22,6 mln gektar nemese memlekettik orman qory jalpy aýmaǵynyń 74,7 paiyzy bekitilgen», - dedi vitse-premer jaýabynda.
Onyń atap ótýinshe, biyl BUU damý baǵdarlamasy men Jahandyq ekologiialyq qory ormandardy basqarýdyń maqsatty stsenariiine saraptama júrgizgen.
Saraptama qorytyndysy atalǵan kezeńde oblys ákimdikteriniń qaramaǵyna berilgen orman sharýashylyǵy memlekettik mekemeleriniń laiyqty deńgeide damymaǵanyn kórsetken.
«Osyǵan orai ókiletti memlekettik organ qazirgi qoldanystaǵy orman sharýashylyǵyn basqarý, josparlaý jáne biýdjet qarajatyn bólý tiimdiligine baǵalaý júrgizedi. Buǵan qosa, Memleket basshysynyń 2021 jylǵy 1 qyrkúiektegi Qazaqstan halqyna Joldaýyna sáikes, Úkimetke osy jyldyń sońyna deiin azamattyq qyzmetshilerdiń eń tómengi jalaqysyn arttyrý bóliginde zańnamaǵa qajetti ózgertýler engizýdi qamtamasyz etý tapsyrylǵan. Osyǵan bailanysty qazirgi ýaqytta azamattyq qyzmetshiler laýazymy tizilimine orman sharýashylyǵy jáne janýarlar dúniesi qyzmetkerlerin qosý máselesi qarastyrylyp jatyr», - dedi Roman Skliar.
