Túrkistan oblysynda «Ushaqtar dári shashyp jatyr» dep jelide jalǵan aqparat taratqan er azamat anyqtaldy. Oǵan qatysty sotqa deiingi tergeý amaldary júrip jatyr, dep habarlaidy "Ult aqparat".
WhatsApp jelisinde «AN-2» markaly ushaqtaryn túsirgen beinejazba men belgisiz er adamnyń «ushaqtar dári shashyp jatyr, soǵan bailanysty jinalamyz» dep aityp jatqan aýdiojazbasy taraldy.
Bul beinejazba boiynsha Ordabasy aýdandyq politsiia bóliminiń politseileri tiisti jumys júrgizdi.
Politseilerdiń anyqtaǵanyna qaraǵanda «AN-2» ushaqtary Ordabasy aýdany Qara aspan aýyldyq okrýginiń mańyna qonǵan.
Atalmysh ushaqtar Shymkent qalasynyń turǵyny, iaǵni JShS-lardyń biriniń iesine tiesili ekeni belgili boldy.
JShS iesi ushaqtardy Qara aspan aýyldyq okrýginiń mańynan jalǵa alǵan egistik alqapqa tyńaitqysh shashý úshin ákelgen.
Atalmysh kólikter kelesi jyldyń kóktemine deiin sol mańda turyp, egistikke paidalanylady.
Sondai-aq politseilerdiń tiianaqty jumysynyń nátijesinde jalǵan aqpar taratqan jigit te anyqtaldy.
Ol Qara aspan aýyldyq okrýginiń turǵyny bolyp shyqty.
Búgingi tańda Ordabasy APB politseilerimen er azamatqa qatysty QR QK-niń 274-baby «Kórineý jalǵan aqparat taratý» boiynsha qylmystyq is qozǵalyp, sotqa deiingi tergeý júrgizilýde.
Jigit óziniń jasaǵan kinásin tolyǵymen moiyndap, barsha turǵyndardan keshirim surady.
