Túrkistan oblysynda taǵy bir mektep ashyldy, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Ordabasy aýdanyndaǵy Shubarsý eldi mekeninde «Ómirhan Qozybaq» atyndaǵy bastaýysh mektebiniń ashylý rásimi ótti. 280 oryndyq bilim oshaǵy jeke kásipkerdiń óz qarajaty esebinen salynǵan. Keler jyly jańa mektepte joǵary synyp oqýshylaryna arnalǵan ǵimaratpen qatar jazǵy sporttyq alańy men joǵary synyp oqýshylarynyń zertteý jumystaryna arnalǵan jylyjai salý josparlanýda.
Respýblika kúni qarsyńynda Túrkistan oblysy ákiminiń birinshi orynbasary Arman Jetpisbai ordabasylyqtardyń qýanyshymen bólisip, jańa mekteptiń ashylýyna qatysty. Óńirdegi bilim salasyndaǵy jańa bastamalarmen bólisti.
«Búgin ózderińizben Ulttyq merekemiz – Respýblika kúni qarsańynda qýanyshty sátti birge bólisý úshin kezdesip otyrmyz. Ózderińizge belgili, Memleket basshysy qyrkúiektegi Joldaýynda bilim salasyna erekshe toqtaldy. Mektep salý – Úkimet pen ákimdikter úshin basty mindetterdiń biri, dedi. 2025 jylǵa deiin elimizde El Prezidentiniń qoldaýymen 800 myń balanyń zamanaýi mektepte oqýyna jaǵdai jasalmaq. «Jaily mektepter» bizdiń oblysta da salynady. Zamanaýi talapqa sai 86 mektepte 60 myń bala bilim alatyn bolady. Osylaisha apatty jaǵdaidaǵy jáne úsh aýysymmen oqityn mektep máselesi sheshiledi. Mektep salýda jergilikti kásipkerlerimiz zor úles qosyp keledi. Biz óz tarapymyzdan bilim salasyn damytýǵa atsalysqan azamattardy qoldaýǵa daiynbyz», – dedi óz sózinde oblys ákiminiń birinshi orynbasary Arman Jetpisbai.
Ordabasy aýdanynda 6 mekteptiń qurylysy júrip jatyr. Onyń 4-ýi (Qaraspan, Aqqoily, Derbes, Tórtkól e/m) jyldyń sońynda paidalanýǵa beriledi dep josparlanýda. Jalpy, Ordabasy aýdanynda 69 mektep bar. Onda 4,5 myńnan astam muǵalim eńbek etse, 37 myńnan astam oqýshy bilim alýda.
