Aqtóbe oblysynyń ákimi Ońdasyn Orazalin koronavirýs infektsiiasyna shaldyqqan naýqastardyń jaǵdaiyn bilip, aýrýhananyń materialdyq-tehnikalyq bazasyn qarap shyqty, dep habarlaidy "Ult aqparat" oblys ákiminiń baspasóz qyzmetine silteme jasap.
Aqtóbedegi ftiziopýlmonologiialyq ortalyq 500 tósek-orynǵa eseptelgen. Sonyń ishinde 75 reanimatsiialyq oryn bar. Emdeý mekemesine barǵan óńir basshysy qabyldaý bólmesi, reanimatsiialyq, rentgen-diagnostikalyq bólimderdi qarap shyqty.
Ftiziopýlmonologiialyq ortalyqtyń bas dárigeri Erlan Tátimovtiń aitýynsha, naýqastar túsken kezde PTR test tapsyryp, nátijesi bir saǵattyń ishinde shyǵarylady. Sondai-aq, qabyldaý bólmesinde rentgen zertteýi jasalady. Bul diagnoz qoiyp, soǵan sai em taǵaiyndaýǵa yńǵaily. Mekeme tolyǵymen joǵary bilikti meditsinalyq kadrlarmen qamtamasyz etilgen. Ortalyqtyń 11 qyzmetkeri qosymsha infektsionist, 11 qyzmetkeri pýlmonolog mamandyqtaryna oqytyldy. Juqpaly aýrýlar bóliminiń jumysyna angiohirýrg, kardiolog, endokrinolog, nevrolog pen hirýrg sekildi barlyǵy 24 maman tartylǵan. Munda dári-dármektiń eki ailyq qory jinalyp, materialdyq-tehnikany nyǵaitý sharalary qabyldanǵan. Ókpeni jasandy jeldetetin 75 apparat, biohimiialyq gemotologiialyq taldaǵysh, rentgen-diagnostikalyq qondyrǵy, kompiýterlik tomograf, fýnktsionaldy kereýetter bar. Reanimatsiia bólimine de jóndeý júrgizilip, qýaty minýtyna 600 l bolatyn ottekti-kontsentratty stansa ornatylǵan. Bul maqsatqa byltyr biýdjetten 618 mln teńge bólindi.
Naýqastarǵa kirip shyqqan Ońdasyn Orazalin aqtóbelikterdiń hal-jaǵdailaryn surap, tez saýyǵyp ketýin tiledi.
«Óńirdiń epidemiologiialyq jaǵdaiy aitarlyqtai kúrdeli. Árine, biz tiisti sharalardy qabyldap jatyrmyz. Eń bastysy – pandemiianyń birinshi tolqynyndaǵy qatelikterdi qaitalamaýymyz kerek. Emdeý mekemeleriniń materialdyq-tehnikalyq bazasyn nyǵaitýǵa az qarjy aýdarylǵan joq. Dárilik zattarmen qamtamasyz etý máselesi sheshildi. Men sizderdiń kásibi biliktilikterińiz ben janqiiarlyqtaryńyzǵa shúbá keltirmeimin. Ókinishke qarai bári de óńir turǵyndaryna bailanysty. Epidemiologiialyq jaǵdaidyń nasharlaýy aqtóbelikterdiń qaýipsizdik sharalaryn saqtamaýynyń saldarynan bolyp otyr. Kóp nárse bizge bailanysty», - dep atap ótti oblys ákimi.
Densaýlyq saqtaý basqarmasynyń basshysy Rústem Isaevtiń aitýynsha, 41 meditsinalyq mekeme, sonyń ishinde 15 infektsiialyq statsionar, 21 alǵashqy meditsinalyq-sanitarlyq kómek kórsetý uiymy, rezervte bes statsionar bar.
Meditsinalyq mekemelerde 3063 tósek-oryn daiyn. Qazirgi tańda infektsiialyq statsionarlarda 388 adam em alyp jatyr. 36 adam karantin statsionarynda. Aqtóbe, Hromtaý, Qandyaǵash pen Shalqar qalalarynda 19 tomografiia kabineti jumys isteidi, 10 zerthanada PTR diagnostikasy jasalady. Olardyń qýaty táýligine 5380 taldaý júrgizýge múmkindik beredi. Vaktsina egý bastalǵaly beri oblysqa 17800 doza ákelinip, 7460 aqtóbelik egildi.
