Qazaqtyń kórnekti aqyny Orazaqyn Asqar 84 jasqa qaraǵan shaǵynda dúnieden ozdy, dep habarlaidy "Ult aqparat".
Bul habardy QR Mádeniet jáne sport ministrligi men Qazaqstan Jazýshylar odaǵynyń baspasóz qyzmeti rastady.
"Orazaqyn Asqar bir saǵat buryn Almatyda aýyr naýqastan qaitys boldy. Aqynnyń jaqyndary men týystaryna kóńil aitamyz. Marqumdy shyǵaryp salý men jerleý boiynsha keiinirek aqparat beremiz", - dep jaýap berdi QR Mádeniet jáne sport ministrliginiń baspasóz hatshysy Aidar Qyryqbai.
Al, odaqtaǵylar aqynmen qoshtasý rásiminiń Jazýshylar odaǵynda ótetinin, naqty ýaqyty qosymsha habarlanatynyn jetkizdi.
Orazaqyn Asqar 1935 jyly 16 mamyrda Shyǵys Túrkistan ólkesiniń Ile aimaǵyna qarasty Múkei Qaratas degen jerde dúniege kelgen. Qulja qalasynda gimnaziiany bitirip, Úrimshi qalasyndaǵy Ulttar institýtynyń til jáne ádebiet fakýltetine túsken. Qosymsha «Shyńjań gazeti» redaktsiiasyna qyzmetke turǵan. 1955 jyly atamekeni Qazaqstanǵa kóship kelip, 1961 jyly Qazaq Memlekettik ýniversitetiniń filologiia fakýltetin bitirip shyǵady. 1955 jyly jaryq kórgen «Qos júrek» atty jas aqyndardyń ujymdyq jinaǵyna óleńderi engen.
Biraz jyl Qazaq KSR Ǵylym akademiiasynyń Sh. Ýálihanov atyndaǵy Tarih, etnografiia jáne arheologiia institýtynda kishi ǵylymi qyzmetker, odan keiin Qazaqstan Jazýshylar odaǵynyń kórkem ádebietti nasihattaý biýrosynda nusqaýshy, respýblikalyq Kitap palatasynda bólim meńgerýshisi, «Jalyn» baspasynda aǵa redaktor bolǵan. Jyldar boiy qazaqtyń qara óleńin el ishinen jinap, eki tomyn bastyrdy. «Ádebi mura» baǵdarlamasyna orai, «Álem balalar ádebietiniń» qazaq tilindegi elý tomdyǵyn shyǵarý jumysyna atsalysty.
1996 jyldan beri Qazaqstan Jazýshylar odaǵy basqarmasynyń múshesi. Halyqaralyq "Alash" ádebi syilyǵynyń laýreaty. "Eren eńbegi úshin", "Táýelsizdiktiń 10 jyly" medaldarynyń iegeri. Muqaǵali atyndaǵy syilyqtyń iegeri. Panfilov aýdanynyń Qurmetti azamaty.
"Tuńǵysh" (1964), "Meiirim" (1969), "Kúngei" (1975), "Láilá" (1977), "Kókorai" (1979), "Balqaraǵai" (1981), "Sáýlet" (1984), "Taýdai bol!" (1984), "Beljailaý" (1985), "Órkesh" (1987), "Kerimsal" (1991), "Barkórneý" (1992), "Kerimsal" (1994), "Jarapazan" (1995), "Orbulaq" (2000), "Táýelsizdik tartýlary" (2001), "Otan dep oianǵanda" (2004), "Atamekenge oralǵanda" (2005), "Qos qońyraý" (2005) "Altyn abdyra" (2007), "El ishinde" (2008), "Balalarym - baqytym" (2008) atty jáne t.b. jyr jinaqtary jaryq kórgen.
