- Kesheden beri úzdiksiz jaýǵan qardyń áserinen Oral qalasynyń «Samal» shaǵynaýdany, Zachagan kenti jáne Derkól aýmaǵynda elektr jaryǵy sónip qaldy, dep habarlaidy QazAqparat.
«Batys Qazaqstan elektr jelilerin taratý kompaniiasy» AQ basqarma tóraǵasy-direktory Qýat Mýsinniń aitýynsha, qazirgi kezde segiz brigada aqaýdy jóndeýmen ainalysýda. Keshke deiin elektr jaryǵy berilýi tiis. Qalyń qardan kei jerlerde terekter qulaǵan. Aýa raiynyń mundai «tosyn minezin» japyraqtary túsip úlgermegen aǵashtar da kútpegen syndy. Oblys aýdandarynda da jaǵdai baqylanýda. Oblystyń ońtústigindegi Jánibek, Bókei ordasy aýdandarynda kerisinshe jańbyr jaýyp tur. Ázirge olardan elektr symdarynyń úzilgeni jóninde habar túsken joq.
Qazirgi kezde qala kóshelerinde jappai tazalaý jumystary júrip jatyr. Qar erip, midai ezilýde. Bul avtokólikterdiń qozǵalysyna kedergi keltirýde. Túiisip qalyp jatqandary da barshylyq. Kesheden beri qysqy dóńgelekke aýystyratyn oryndarda da kezek kóp.
«Búgin aýa raiyna bailanysty áýejai jergilikti saǵat 12.00-ge deiin jabyldy. Astanadan kele jatqan, jergilikti saǵat 08.15-te qonýy tiis ushaq Atyraýǵa ushyp ketti»,- dep habarlady QazAqparat tilshisine «Oral» halyqaralyq áýejaiynan.
Aita keteiik, buǵan deiin BQO TJ departamenti 30-31 qazanda óńirde jaýyn-shashyn, tuman men kóktaiǵaq oryn alyp, ońtústik-batystan soqqan jeldiń sekýndyna 15-20 metrge deiin jetetini jóninde eskertken bolatyn.
