Aqtóbede 27 jastaǵy jigit saqtaný quraldarynsyz qaladaǵy eń biik ǵimaratqa órmeledi, - dep habarlaidy Tengrinews.kz tilshisi. 25-qabatty úige balkondar arqyly órmelep shyqqan jigit Oral qalasynyń turǵyny eken.
Úsh kún buryn "Aqtóbelik órmekshi adam" atty video jelide tarap, qoldanýshylar arasynda talqyǵa tústi. Bireýler jigittiń isi qaýipti ári máni joq dese, endi bir top adam - osy arqyly óskeleń urpaqqa nashar úlgi kórsetildi degen.
Al ǵimaratqa órmelegen Azamat Súiinishevtiń ózi videony byltyr túsirilgenimen jaqynda ǵana jariialanǵanyn aitady.
"Túsiremiz, baraq, birden jariialamaimyz, tek jarty jyldan keiin shý bolmaýy úshin. Tańǵy saǵat 4-te túsirildi, bári uiyqtap jatqanda. Mende múldem eshteńe bolǵan joq, arnaiy zattar nemese saqtaný quraldary bolmady. Bul ǵimaratty 2015 jyly kórdim de, sodan beri 2 jyl daiyndaldym, bárin eseptep. Onynshy qabatqa deiin 2,5 - 3 minýtta órmelep shyqtym da, demaldym. Qolym talyp qaldy. Ary qarai árbir 2-3 qabat saiyn tynyǵyp otyrdym. 25 qabatqa deiin naqty qansha ýaqyt ketkenin aita almaimyn. Videoda órmelei bastaǵanda qarańǵylaý bolǵany kórinip tur. Al sońǵy qabattarda tań ata bastady", - deidi ol.
Azamat - vahtalyq tártippen jumys isteitin qarapaiym turǵyn. Onyń aitýynsha, ekstrim ózi úshin aýadai qajet, biraq, ol eshkimdi óz isin qaitalaýǵa shaqyrmaidy.
"Jaǵymsyz sózderge nazar aýdarmaýǵa tyrysamyn. YouTube-tegi roliktiń tolyq nusqasynda muny qaitalaý qaýipti ekeni kórsetilgen. Mundai shetelde jáne Reseide bar. Bizde adamdar túsine bermeidi. Men eshkimdi úgittemeimin. Men úshin bul aýadai qajet. Árine qorqynysh bolady. Men parkýr men kaskaderlik ádisterdi bailanystyramyn, munymen kópten shuǵyldanyp kelemin. Bala kezimde Djeki Channyń kinolaryn kóp kórgenmin, oǵan qatty uqsaǵym keletin. Eshkim úiretken joq, jattyqtyrǵan emes", - deidi Azamat.
Jigitti Reseidiń kaskaderlik mektebine shaqyrǵan. Degenmen ol otansúigishtiginen odan bas tartypty.
"Maqsatym bar, Qazaqstanda joq sportzal salǵym keledi. Kúres, jattyǵý zaly, kaskaderlik, gimnastikalyq jáne basqa da zaldar bolady. Jastarymyz sportpen shuǵyldanǵanyn qalaimyn", - dep armanyn bólisti ol.
