27 jeltoqsanda Oral qalasynyń ákimshilik soty bloger Aibolat Bókenovti bes kúnge qamaý týraly qaýly shyǵardy. Sot ony jergilikti "Pýls goroda" basylymynyń qyzmetkeri Dana Dúisekenovanyń "densaýlyǵyna qasaqana túrde ziian keltirdi" dep tanydy.
Dúisekenovanyń aryzyndaǵy derekke sáikes, bloger Bókenov 12 jeltoqsanda politsiia departamentiniń brifing kezinde ony kameraǵa túsirmek bolyp, "jaraqattaǵan". Bul brifing Oralda politsei qyzmetkerleriniń qatysýymen bolǵan jol apatyna bailanysty uiymdastyrylǵan. Dúisekenova budan keiin Facebook-taǵy paraqshasynda Bókenov "qolyn ustap, syndyryp jibere jazdaǵanyn, sodan keiin qoly qatty aýyryp, kógerip ketkenin" jazdy.
Bókenov sottan keiin sot qaýlysymen kelispeitinin, sheshimdi apelliatsiiaǵa beretinin aitty. Blogerdiń aitýynsha, brifing kezinde ol telefonyn julyp alǵan Dúisekenovanyń janyna barǵan. Bókenovtiń sózin sotta úsh kýáger rastady.
Bókenovtiń advokaty Abzal Quspannyń aitýynsha, sotqa deiin olarǵa daýdy mediatsiia arqyly retteý týraly usynys túsken. Biraq ol úshin bloger "áleýmettik jelide post jazbai, aqparat quraldaryna suhbat bermeitinine kepildik berýi kerek" bolǵan.
- Áýel basta Bókenovke - 200 myń teńge kóleminde (520 myń dollardan astam), keiinirek 100 myń teńge tóleýdi usyndy. Budan bólek, Bókenov óziniń kináli ekenin moiyndap, ókinip, keshirim suraýy da kerek dep aityldy. Olar sonymen birge Aibolat Bókenov áleýmettik jelilerdegi jazbalary úshin jáne osy sot boiynsha aqparat quraldarynda jariialanatyn materialdar úshin de jaýap berýi tiis dedi, - dedi Abzal Quspan.
Sot protsesi barysynda Dana Dúisekenova "ózin qýdalaǵany úshin" taǵy birneshe bloger men jýrnalistiń ústinen sotqa aryz túsiretinin aitty. Ol Azattyqqa túsinikteme berýden bas tartty.
Bloger Aibolat Bókenov birneshe apta buryn politseilerdiń qatysýymen bolǵan jol apaty týraly aqparat taratqan. Jol apaty bolǵan oryndy videoǵa túsirgen bloger izinshe "politsiia qyzmetkerine baǵynbady" dep aiyptaldy. 5 jeltoqsanda ákimshilik sot Bókenovke eskertý jasady.
