Oralda qalalyq juqpaly aýrýlar modýldik aýrýhanasynyń qurylysy aiaqtaldy, dep habarlaidy "Ult aqparat".
BQO densaýlyq saqtaý basqarmasy basshysynyń orynbasaryy Gúlnár Ábdirahmanovanyń óńirlik kommýnikatsiialar qyzmeti alańynda ótken brifingide málim etkenindei, oblystyq juqpaly aýrýlar aýrýhanasynyń bólimshesi retinde jumys jasaityn jańa emdeý mekemesi qazirgi kezde qajetti jabdyqtarmen qamtamasyz etilýde.
Onyń sózine qaraǵanda, aýrýhana tolyq jabdyqtalǵan soń qoldanysqa beriledi. Sonyń ishinde merdiger mekeme ottegi stansasyn 10 jeltoqsanda ákelmekshi.
«Modýldik aýrýhanaǵa kadrlar tolyqtai iriktelip alyndy. Olar Batys Qazaqstan meditsina kolledji bazasynda indetti emdeýge bailanysty klinikalyq hattamaǵa sáikes biliktilikterin kóterip, sertifikattar aldy. Sonymen qatar qosymsha rezervtik tizim daiyndaldy. Biyl oblysqa 116 dárigerdiń kelgeni belgili, olar da oqytyldy, jumysqa tartylatyn bolady», dedi G.Ábdirahmanova.
Kúni búgin oblysta 185 tósektik 4 karantindik statsionarda 35 adam jatyr. Al 359 tósektik 7 juqpaly aýrýlar aýrýhanasynda 136 adam emdelýde. Sonyń ishinde 9 naýqas jansaqtaý bóliminde, bulardyń bári de sozylmaly syrqatqa, 8-i júrek-qan tamyrlary dertine shaldyqqan. Sondai-aq ókpeni jasandy jeldetý apparatyna 6, ottegi kontsentratoryna 10 adam qosylǵan.
