Oralda kórnekti jazýshy, Memlekettik syilyqtyń iegeri Hamza Esenjanovtyń (1908-1974) 110 jyldyǵyna orai sharalar ótti, dep habarlaidy "Ult aqparat".
Barsha oqyrmanǵa «Aq Jaiyq» trilogiiasymen tanymal qalamgerdiń aldymen músini ashyldy.
Keiin qala ákimi Murat Muqaev Aq Jaiyq jurtshylyǵyn óńirdegi osynaý eleýli oqiǵamen quttyqtady.
Eskertkishtiń ashylý rásimine jazýshynyń nemere inisi, akademik, biologiia ǵylymdarynyń doktory, Ál-Farabi atyndaǵy QazMUÝ-dyń professory Aitqoja Biǵaliev, H.Esenjanovtyń kelini, shyǵystanýshy, ilespe aýdarmashy-sinhronist, Abylai han atyndaǵy Halyqaralyq qatynastar jáne álem tilderi ýniversitetiniń professory, filologiia ǵylymdarynyń kandidaty Dina Esenjan, tarihshy, hamzatanýshy Sailaý Súleimenov jáne basqalar qatysyp, estelikterin aitty.
Músindi saltanatty túrde aqyn, Qazaqstan Jazýshylar odaǵy BQO bólimshesiniń tóraiymy, halyqaralyq «Alash» ádebi syilyǵynyń iegeri Aqushtap Baqtygereeva men Aitqoja Biǵaliev ashty.
Budan keiin H.Bókeeva atyndaǵy oblystyq qazaq drama teatrynda «Hamza Esenjanov - adamzattyń asyly» atty ádebi-mýzykalyq kesh ótip, qalamger ómiri men shyǵarmashylyǵyna taldaý jasaldy.
Jiyn barysynda «Tuǵyry biik talant» atty jańa kitaptyń tanystyrylymy bolyp, teatr foiesinde «Qaisar talant arqalaǵan nar senim, umytpaityn urpaqtaryń bar seniń» taqyrybynda kitap kórmesi, fotoekspozitsiia men qundy jádigerler kelýshiler nazaryna usynyldy.
Merekeni uiymdastyrýǵa H.Esenjanov atyndaǵy oblystyq balalar men jasóspirimder kitaphanasy da belsene atsalysty.
Eske sala keteiik, budan buryn Batys Qazaqstanda jazýshyǵa taǵy bir músin ornatylǵanyn jazǵan bolatynbyz.
