Oralda Ulttyq ulannyń 5517-áskeri bóliminde Jalpyulttyq aza tutý kúnine orai qaraly mitingi ótti, dep habarlaidy QazAqparat.
QR Ulttyq ulany «Batys» óńirlik qolbasshylyǵynyń baspasóz hatshysy, podpolkovnik Erbolat Sultanovtyń málim etkenindei, eldegi tártipsizdik kezinde Qyzylorda men Taldyqorǵan qalalarynda áskeri sarbazdar Madiiar Qaisarov pen Aibat Amanov qaza tapqany belgili.
Olar Otan aldyndaǵy boryshyn sońyna deiin adal oryndap, erlikpen kóz jumdy. Ekeýi de qarýly sodyrlar memlekettik mekemelerge shabýyl jasaǵan kezde mert boldy.
Qatardaǵy jaýynger Madiiar Qaisarov Qyzylordada qarýlastaryn ári qarai iterip qutqaryp, ózi qylmyskerlerdiń júk kóligi dóńgelekteriniń astyna tústi.
Al Aibat Amanov maroderlermen shaiqasta ómirden ozdy. 20 jastaǵy Madiiar men 19 jastaǵy Aibat barlyq áskeri qurmetpen jerlendi.
«Qazaqstanda jasalǵan lańkestik shabýyl saldarynan beibit adamdar, quqyq qorǵaý organdary qyzmetkerlerimen birge Qyzylorda qalasyndaǵy 5547-áskeri bólimi jáne Taldyqorǵandaǵy 5514-áskeri bóliminiń áskeri qyzmetshileri, qatardaǵy jaýyngerler Madiiar Qaisarov pen Aibat Amanov erlikpen qaza tapty. Júzdegen adam túrli dárejede jaraqat aldy. «Batys» óńirlik qolbasshylyǵy jáne óz atymnan kóz jumǵan sarbazdar men politsiia qyzmtkerleriniń týma-týystaryna, dostaryna qaiǵyryp kóńil aitamyn. Qiyn-qystaý kezeńde Ulttyq ulandyqtar Qazaqstan halqyna jáne áskeri antqa adal ekendikterin dáleldedi. Biz olardyń erligin eshqashan umytpaimyz», dedi «Batys» óńirlik qolbasshysy, general-maior Arman Jumaǵaliev.
