Oralda turǵyn úi órtenip, eki adam qaza tapty, dep habarlaidy "Ult aqparat".
Oblystyq densaýlyq saqtaý basqarmasynyń baspasóz qyzmeti málim etkenindei, oqiǵa I.Kýlichev kóshesindegi turǵyn úide boldy.
Jedel járdem 11 jeltoqsan kúni saǵat 23.20-da shaqyrylyp, úsh brigada jumys istedi.
Órt saldarynan 8 jasar er bala men 67 jastaǵy er adam jedel járdem kelgenge deiin kóz jumdy.
Jeńil dárejede gazdan ýlanǵan 4 jasar qyz bala oblystyq balalar aýrýhanasyna jatqyzyldy. Jeńil dárejede gazdan ýlanyp, jaraqat alǵan 43 jastaǵy er adam qalalyq kópbeiindi aýrýhanaǵa jetkizildi.
BQO TJ departamenti memlekettik órt baqylaý basqarmasynyń aǵa injeneri Saǵdat Ánestiń naqtylaýynsha, I.Kýlichev kóshesi 13-mekenjaiynda órt bolyp jatqany jóninde saǵat 23.17-de habar túsken.
Aýmaǵy 80 sharshy metrdi qamtyǵan órt kezinde turǵyn úidiń tóbe jabyndysy, jeke zattar men jihaz janyp ketti. Órt sóndirý qyzmeti kelgenshe, sol mańnan ótip bara jatqan azamat gazdan aýyr jáne jeńil dárejede ýlanǵan eki adamdy (bireýi - bala) qutqardy. Olar aýrýhanaǵa jatqyzyldy.
Órt ornynan eki adamnyń múrdesi tabyldy. Oqiǵa ornynan 27 litrlik gaz ballony shyǵaryldy. «Tilsiz jaýdy» aýyzdyqtaýǵa jeke quramnan 14 adam, 5 tehnika jumyldyryldy. Qazirgi kezde órttiń shyǵý sebebi anyqtalýda.
