Oralda tirkelmegen dini birlestiktiń zańsyz qyzmeti áshkerelendi, dep habarlaidy "Ult aqparat".
BQO politsiia departamentiniń ekstremizmmen kúres basqarmasynan túsken málimetke qaraǵanda, dini birlestikti quryp, oǵan basshylyq etken eki turǵyn jaýapqa tartyldy.
QR Ákimshilik quqyqbuzýshylyq kodeksiniń 489-babyna sáikes Oral qalasynyń 1988 jylǵy N. jáne 1986 jylǵy I. degen turǵyndaryna qatysty hattama toltyrylyp, árqaisysyna 145 850 teńge aiyppul salyndy. Olardyń ekeýi de tirkelmegen, protestanttyq baǵyttaǵy dini aǵymdy ustanǵan. Qalǵan kelýshilermen aldyn alý áńgimeleri júrgizildi.
Atalǵan dini birlestik ekstremizmmen kúres basqarmasy qyzmetkerleriniń nazaryna 2019 jyly ilikken. Sol kezde birlestik basshylary ákimshilik jaýapkershilikke tartylyp, olarǵa tiisti organda mindetti túrde tirkelý kerektigi týraly eskertilgen.
Soǵan qaramastan, biyl osy dini aǵymdy ustanatyndar N-nyń jeke úiinde jinalǵan. Politsiia qyzmetkerleri barǵan kezde úide 15-ten astam eresek adam jáne onǵa jýyq bala bolǵan. Barlyq qatysýshylar dini ándi jappai aityp otyrǵan. Demalys kúnderi qatysýshylar sany budan da kóbeiedi.
Ustalǵandardan aqparattyq paraqshalar men kitapshalar tárkilendi.
BQO politsiia departamentiniń ekstremizmmen kúres basqarmasy oblys turǵyndaryna qyraǵylyq tanytyp, dástúrli emes dini aǵymdarǵa ilespeý, zańsyz jiyndarǵa qatyspaý kerektigin, munyń sońy qaterli jaǵdaiǵa soqtyrýy múmkin ekendigin eske salady.
