Oraldaǵy «Atameken» óner ortalyǵynda Táýelsizdiktiń 30 jyldyǵyna jáne Bókei handyǵynyń 220 jyldyǵyna arnalǵan «Táýelsizdik tolǵaýy» atty halyqaralyq aqyndar aitysy márege jetti, dep habarlaidy QazAqparat agenttigi.
Aitýly dodaǵa Qazaqstan ǵana emes, sondai-aq Qytai, Mońǵoliia, Qyrǵyzstan elderiniń atynan kelgen saiyskerler qatysyp, baq synady.
Aitysty belgili aqyn, «Parasat» ordeniniń iegeri, Qazaqstannyń eńbek sińirgen qairatkeri, Halyqaralyq aitys aqyndary men jyrshy-termeshiler odaǵynyń tóraǵasy Júrsin Erman júrgizdi.
Batys Qazaqstan oblysynyń ákimi Ǵali Esqaliev barsha jinalǵan qaýymdy Táýelsizdik toiymen quttyqtap, aityskerlerge alǵysyn bildirip, biyl jetpis jastyń biigine shyqqan J.Ermannyń iyǵyna shapan japty.
Aitys barysynda Aibek Qaliev, Bekarys Shoibekov, Rústem Qaiyrtai, Jansaia Mýsina syndy tanymal aqyndarmen qatar jastar da, barlyǵy 22 saiysker sahnaǵa shyqty.
Solardyń ishinde osyndai deńgeidegi aitysqa alǵash ret qosylǵan batysqazaqstandyq Meiirman Shákenov atyraýlyq Syrymbek Sársenbaevpen ádemi aitystyń úlgisin kórsetti. Qyrǵyz aqyny Azamat Bolgonbaevpen sóz saiystyrǵan taǵy bir batysqazaqstandyq Jarqynbek Shyntaevty atap ótýge bolady.
Bul aitystaǵy taǵy bir jańalyq, qyrǵyz eliniń jas manasshysy Aziz Biimyrza ýýlýnyń áigili «Manas» jyrynan úzindi oryndaýy boldy. Sondai-aq tanymal epik jyrshy, qyzylordalyq Berik Júsipov te óz ónerin kórsetti.
«Mine, biyl Táýelsizdiktiń 30 jyldyǵyn keńinen atap ótýdemiz. Azattyqqa qol jetkizýimizge Jeltoqsan oqiǵasyna qatysqan jastardyń úlesi ushan-teńiz. Aqiyq aqyn Juban Moldaǵaliev Jazýshylar odaǵynda ótken, Kolbin qatysqan jiynda «Mundai masqarany, mundai qorlyqty kórgenimshe, maidan dalasynda qalýym kerek edi», dep jastarǵa arasha túsip, batyrlyq tanytty. Sol jeltoqsanda erlikpen qaza tapqan Qairat, Sábiralarǵa Qazaqstanda ǵana emes, burynǵy odaqtas respýblikalarda eskertkish ornatýǵa bolady. Óitkeni Jeltoqsan oqiǵasy odaq kólemindegi keiingi tolqýlarǵa, iaǵni Táýelsizdikke jol ashty», dedi óz sózinde qazylar alqasynyń tóraǵasy, Qazaqstannyń Eńbek Eri, KSRO jáne Qazaqstannyń halyq ártisi Asanáli Áshimov.
Qazylar alqasynyń sheshimimen jáne uiymdastyrýshylardyń usynysymen barlyq qatysýshylarǵa 500 myń teńge kóleminde aqshalai syilyq jáne Syrym Datuly atyndaǵy tósbelgi tabys etildi.
Aitys barysynda birqatar jergilikti aqyndar QR Mádeniet jáne sport ministri Aqtoty Raiymqulovanyń alǵyshatymen marapattaldy. Sondai-aq aitystyń týyn kóterip júrgen batysqazaqstandyq aqyn, Qazaqstan Jazýshylar odaǵy BQO filialynyń tóraǵasy Baýyrjan Haliollaǵa da qurmet kórsetildi.
