Oral qalasynda sońǵy tórt kúnde 235 adamnyń koronavirýs juqtyrǵany tirkeldi, dep habarlaidy "Ult aqparat".
BQO sanitarlyq-epidemiologiialyq baqylaý departamenti málim etkenindei, indet sondai-aq Bórli, Báiterek aýdandarynda órship tur.
Atap aitqanda, 4-7 sáýir aralyǵynda Bórlide 81, Báiterekte 41 adamnyń dertke shaldyqqany anyqtaldy. Sol sekildi Shyńǵyrlaýda 19, Terektide 15, Qaztalovta 15, Tasqalada 10 adamnyń syrqattanǵany belgili boldy.
Oblysta sońǵy tórt kúnde 429 adam tirkelse, sonyń 243-i JRVI belgilerimen qaralǵanda, 99-y buryn aýyrǵandarmen qarym-qatynasta bolǵannan keiin, 83-i profilaktikalyq maqsatta, tórteýi statsionarǵa jatqyzar aldynda tekserilgende anyqtaldy.
Indet bastalǵannan beri óńirde aýyrǵandar sany 15900-ge jetse, sonyń 12763-i jazylyp shyqty. 249 adam kóz jumdy.
