Oral qalasynda áleýmettik osal topqa jatatyn 200-ge jýyq adamdy baspana kezeginen negizsiz shyǵaryp tastaǵan. Al olarǵa tiesili páterlerdi basqalarǵa bergen, dep habarlaidy Sputnik Qazaqstan agenttigi Astana TV arnasyna silteme jasap.
Batys Qazaqstan oblysy boiynsha sybailas jemqorlyqqa qarsy qyzmettiń basqarma basshysynyń orynbasary Áliia Denizbaevanyń aitýynsha, kezekten shyǵarylǵan júzdegen adamnyń ishinde jetim balalar, kópbalaly otbasylar, tolyq emes otbasylar jáne taǵy basqa áleýmettik osal toptar bar.
"Qazirgi kezde kezekten shyǵarylǵan barlyq azamattyń kezegin qalypqa keltirý boiynsha tiisti sharalar qabyldandy. Memlekettik organdarǵa tiisti usynymdar berildi. Olardyń nátijesi boiynsha naqty sharalar qabyldandy", - deidi Denizbaeva.
Sheneýnikterdiń sharapatyna kenelip, kezekten tys úi alǵan 169 adamnyń kim ekeni belgisiz. Sybailas jemqorlyqqa qarsy qyzmettiń málimetine sáikes, páterge muqtaj emes taǵy 247 adamǵa baspana berilgen. Al oblysta 1800 jetim úmitin úzbei, úi kezegin kútip júr. Olardyń ishinde Ásel Antaeva da bar. Ol qýyqtai bólmede úsh balasymen on bir jyldan beri turady. Sol kezde baspana kezegine 597-bolyp tirkelgen. Qazir 170-orynda tur.
"Biz qala ákimine de, orynbasarlaryna da bardyq. Turyp jatqan páterimizde jaǵdai jasalmaǵan, jýynatyn jer joq. Kórip otyrsyz ǵoi, qyzym osy jerde tamaq iship, osy jerde sabaǵyna daiyndalady. Bizdiń bólmege kún túspeidi, syzdan balam jótelip, aýyrady. Qyzymnyń búkil kitaby sý bolady", - deidi Antaeva.
Balalar úiiniń túlekteri "Shańyraq" jasóspirimder úiinde 23-ke deiin tura alady. Biraq kóbiniń jasy áldeqashan asyp ketken, arasynda tipti 50-di eńsergenderi bar. Óitkeni olardyń baratyn basqa jeri joq. Sondyqtan úi kezegin ondaǵan jyl kútýge májbúr. Biraq jetimniń nesibesine jarmasqan jergilikti sheneýnikter páterdi hantalapaiǵa salǵan.
Bir qyzyǵy, úidi basqaǵa bergen sheneýnikter tek tártiptik jazamen qutylýy múmkin.
