Oralda politsiia qyzmetkeri mas kúiinde jol apatyna ushyrady, dep habarlaidy "Ult aqparat".
BQO politsiia departamentiniń resmi ókili Bolatbek Belgibekovtiń málim etkenindei, oqiǵa 13 maýsym kúni saǵat 02.39-da M.Sholohov pen Ǵ.Qurmanǵaliev kósheleriniń qiylysynda boldy.
Abai politsiia bólimi jergilikti politsiia qyzmeti bóliminiń bastyǵy «Folksvagen Passat» kóligimen araqashyqtyqty saqtamai, alda ketip bara jatqan, 33 jastaǵy áiel júrgizgen «Aýdi A4» avtokóligimen soqtyǵysýǵa jol bergen.
«Eki júrgizýshi de meditsinalyq kýálandyrýǵa jiberildi. Saraptama qorytyndysyna sáikes júrgizýshi áiel aiyq, politsiia qyzmetkeri jeńil dárejeli mas kúiinde bolǵan», dedi Belgibekov.
Belgibekovtiń sózine qaraǵanda, politsiia qyzmetkeri 12 maýsym kúni keshkisin úiinde azdaǵan mólsherde spirttik ishimdik ishkenin, sosyn uiyqtaýǵa jatqanyn aitqan. Biraq saǵat 02.15-te jumysqa shaqyrtqannan keiin avtokólik rýline otyrǵan.
«Politsiia qyzmetkerin shynynda da jumysqa shaqyrtqany anyqtaldy. Qazirgi kezde oǵan qatysty qyzmettik tekserý júrgizilýde. Sonyń qorytyndysyna sáikes eń qatań shara alynatyn bolady», dedi Belgibekov.
