©Sputnik / Merýert Alimova
Oralda oiyn alańynda taǵy bir balanyń saýsaǵy kesilip ketti. Bul joly oqiǵa Qonaev shaǵyn aýdanyndaǵy balalar alańynda boldy, dep jazady Sputnik Qazaqstan agenttigi "Moi gorod" portalyna silteme jasap.
13 jastaǵy Dias Qaiyrǵojinniń anasy jýrnalisterge 1-úidiń aýlasyndaǵy balalar alańynda balasy ortanǵy saýsaǵyn jaraqattap, shynashaǵynyń bóligin kesip alǵanyn aitty. Dias 25 shilde kúni túski ýaqytta týystaryna qonaqqa baryp, basqa balalarmen birge alańǵa oinaýǵa shyqqan. Biraq on minýttan keiin jaraqat alyp, úige júgirip kelgen. Jaqyndary jedel járdem shaqyrǵan, biraq ony kútpei óz kólikterimen aýrýhanaǵa jetkizgen.
"Jaqyn jerdegi qalalyq aýrýhanaǵa apardyq. Ol jerde onyń jaraqatyn tańyp, bizdi kópsalaly balalar aýrýhanasyn jiberdi. Balalar aýrýhanasynda qajettiniń barlyǵyn jasady. Jarany óńdep, etke salbyrap turǵan saýsaǵyn tigip berdi. Bul bala úshin soqqy. Biz basynda eshqaida shaqymdanbadyq. Biraq qansha ýaqyt ótse de, átkenshekter sol qalpy tur. Ony eshkim ornynan alyp tastamaǵan. Ár balaǵa onyń qaýipti ekenin túsindirip bitpeisiń ǵoi", – deidi zardap shekken balanyń týystary.
Dárigerler saýsaqtyń bitip ketýi úshin bar kómekti kórsetip jatyr. Alaida eshqandai boljam jasai almaidy.
Eske salsaq, osyǵan uqsas jaǵdai 27 shilde kúni balalar alańynda boldy. Onda týra osyndai jattyǵý quralynda 13 jastaǵy jasóspirim eki saýsaǵynyń bóliginen aiyryldy.
Buǵan qosa, 11 jastaǵy Nurámir Esenálievtiń ústine fýtbol qaqpasy qulady. Bala aýrýhanada qaitys boldy.
Oral ákimdigi qaladaǵy barlyq balalar jáne sport alańdaryn tekserýge kirispek. Sodan keiin anyqtalǵan barlyq olqylyqty joiýdy josparlap otyr.
