Oral qalasynyń mamandandyrylǵan ákimshilik soty Abai politsiia bólimi jergilikti politsiia qyzmeti bóliminiń bastyǵyna qatysty ákimshilik quqyqbuzýshylyq týraly isti qarady, dep habarlaidy "Ult aqparat".
BQO sotynyń baspasóz qyzmeti málim etkenindei, atalǵan politsiia qyzmetkeri 13 maýsymda túngi saǵat 03.00 shamasynda «Folksvagen Passat» avtokóligin aidap kele jatyp, «Aýdi A4» kóligimen soqtyǵysýǵa jol bergen.
Anyqtalǵanyndai, ol kólikti mas kúide júrgizgen. Politsiia qyzmetkeri óz kinásin sotta moiyndady.
QR Ákimshilik quqyqbuzýshylyq kodeksi 608-baby 3-bóligine sáikes kólik quraldaryn búldirýge ákep soqqan júrgizýshiniń mas kúiinde avtokólik aidaýy 20 táýlikke ákimshilik qamaqqa alýǵa jáne 7 jyl merzimge kólik quralyn júrgizý quqyǵynan aiyrýǵa jazalanady. Alaida politsiia qyzmetkeri qamaýǵa alýdan bosatyldy. Óitkeni bul sharany Ákimshilik quqyqbuzýshylyq kodeksi 32-baby 2-bóligine sáikes quqyq qorǵaý organdarynyń qyzmetkerlerine qoldanýǵa bolmaidy.
Degenmen politsiia qyzmetkerine tártiptik jaza tónip tur. Is materialdary sheshim qabyldaý úshin Batys Qazaqstan oblysynyń politsiia departamentine joldandy.
Ákimshilik quqyq buzýshylyq týraly is 21 maýsymda sot óndirisine kelip tústi jáne sol kúni qaraldy.
Qaýly zańdy kúshine engen joq.
