foto: mgorod.kz
Oral politseileri kásipker Erkin Muhanǵalievti óltirgen jerde tergeý sharalaryn júrgizdi, - dep habarlaidy Tengrinews.kz agenttigi "Moi GOROD" basylymyna silteme jasap.
Basylym málimetinshe, 9 tamyz tańǵy 10:00 shamasynda tergeýshiler Isatai-Mahambet kóshesinde ornalasqan "Rahat-lýkým" dámhanasynyń aýmaǵyna kelip, kásipker Muhanǵalievtiń ólimine qatysty tergeý júrgizgen. Tergeý alańy qorshalyp, politsiia qyzmetkerleri kezekshilikte turdy. Sálden soń qylmystyń basty kúdiktisi 31 jastaǵy Rýslan Qojantaev tergeý ornyna jetkizildi.
Tergeýshiler men arnaiy jasaq ony aldymen dámhanaǵa, keiinnen kólik turaǵyna apardy. Onda ol qansyrap jatqan Erkin Muhanǵalievke pyshaq jaraqatyn qalai salǵanyn kórsetti.
Odan ári Qojantaevty qarýly kúzet qyzmetkerleri Isatai-Mahambet kóshesiniń boiymen alyp ketti. Ol bul kóshede qylmys jasaǵan soń qalai qashyp ketkenin kórsetti. Tergeý barysynda kúdikti baisaldy, aqyryn sóilep, politsiia qyzmetkerleriniń barlyq buiryǵyn oryndady.
Eske salaiyq, oqiǵa 6 tamyzda keshke bolǵan edi. Erkin Muhanǵalievtiń máiiti P.Atoian atyndaǵy stadionnyń turaǵynan tabyldy. Kúdiktilerdiń jeke basy anyqtaldy - olar kisi óltirgennen keiin oqiǵa ornynan qashyp ketken 31 jastaǵy Rýslan Qojantaev pen 21 jastaǵy Turlan Amangeldi.
Oraldan shyǵatyn jáne kiretin joldardy politseiler tekserip, kúdiktiler barýy múmkin degen jerler tekserildi. Qylmyskerlerdi ustaýǵa kúsh qurylymdary jumyldyryldy.
Artynsha oraldyq kásipkerdi óltirgen sáttiń videosy taraǵan edi. Kadrda kásipkerdiń eki jigitpen dámhanada qalai sóilesip jatqany kórsetilgen. Kenetten janjal bastalyp, jigitterdiń biri kásipkerdiń moiyn tusyna pyshaq suǵyp alady. Sodan keiin ol taǵy birneshe ret urady. Jaraqat alǵan Muhanǵaliev terezeden shyǵyp úlgeredi, biraq olar ony qýyp jetip, kóshede taǵy 15 ret pyshaqtaǵan. Kásipker jedel járdem kelgenshe qaitys boldy.
