Oralda kásipker qyz-kelinshekter kópbalaly analarǵa qolushyn sozdy, dep habarlaidy "Ult aqparat".
«Jasyl el» qozǵalysy oblystyq shtabynyń jetekshisi Aslan Tapishevtiń aitýynsha, elimizde tótenshe jaǵdai jariialanǵannan keiin shtab janynan volonterler korpýsy quryldy.
Volonterler qataryna «Jasyl el» sarbazdarymen qatar ózge eriktiler de qosyldy. Olar koronavirýstyń juqpaly dert ekendigin, úide otyrý kerektigin turǵyndarǵa túsindirip, broshiýralar taratty.
«Jumys barysynda bir tańǵalǵanym, bir top kásipker qyz-kelinshekter ózderi habarlasyp, qandai kómek bere alamyz dedi. Sóitsek, ásemdik salondarynyń ieleri eken, karantinge bailanysty qyzmetteri ýaqytsha toqtap qalǵan. Soǵan qaramastan, biznesten tapqan qarjyny óz qajetimizge jumsamai, kóp balaly analarǵa azyq-túlikpen kómekteseiik dedi. Biz muny qup aldyq», deidi Aslan Tapishev.
Osylaisha oblystyq jastar saiasaty máseleleri basqarmasynyń qoldaýymen eriktiler tizimge sáikes Oral men qalaǵa qarasty kentterdegi kóp balaly analarǵa kómek berdi.
Ár otbasynda jaǵdai túrlishe. Keibireýinde 4 nemese 6, tipti 9 balasy bar úiler bar eken. Kóbin jubailary tastap ketken nemese ómirden ozǵan. Ómirdiń sondai qiyndyqtaryna qaramastan, balalaryn tárbielep otyrǵan analardyń jankeshti tirligi keiingi jastardy rýhtandyrady.
«Sol sekildi jalǵyzilikti qariialar da barshylyq. Árine, ákimdik qyzmetkerleri barlyǵyn biledi, qolushyn berip te jatyr. Degenmen erikti bolǵan soń bárin kózben kórip, kóńilge túigenge ne jetsin! Osyndai qysyltaiań kezde elmen birge bolyp, muqtaj adamdarǵa járdemdesý – boryshymyz», dedi A.Tapishev.
BQO jastarmen jumys jónindegi resýrstyq ortalyǵynyń basshysy Meiirbek Nurkenniń sózine qaraǵanda, 17 naýryz ben 22 sáýir aralyǵynda «Aqjaiyq jastary» volonterleri 70 myńnan astam kóprettik betperdeni qala turǵyndarymen birlese tigip, adamdar kóp jinalatyn oryndarda taratty.
Eki myńnan astam muqtaj otbasyna áleýmettik kómek sebeti (azyq-túlikke qosa gigienalyq, sharýashylyq taýarlary, taǵy basqa zattar) jetkizildi.
Tótenshe jaǵdai jariialanǵan kezde bastapqyda eriktiler sany 400-den assa, karantin engizilgennen keiin olardyń sany qysqardy. Qazirgi tańda kómek qolyn sozyp júrgen 50 volonterdiń barlyǵy kólikpen qamtylǵan.
«Aýdan ortalyqtary men aýyldarda da osyndai jumystar atqarylýda. Kúni búginge deiin 1 myńǵa jýyq otbasyna kómek berilip, 5 myń dana kóprettik betperde taratyldy. Buǵan 218 volonter tartylǵan edi, shekteý sharalary kúsheitilgennen keiin olar qyzmetin toqtatty. Degenmen volonter kómegi qajet bolǵandar 109 nemese 8-705-143-06-06 telefonyna habarlasa alady. Qala men aýdandar boiynsha da ótinimder qabyldanyp, jumys jalǵasa beretin bolady», dedi QazAqparat tilshisine M.Nurken.
