Búgin №40 mekteptegi oqys oqiǵadan keiin 15 oqýshy men 1 muǵalimniń aýrýhanaǵa jetkizilgeni belgili boldy, dep habarlaidy QazAqparat tilshisi.
Oblystyq densaýlyq saqtaý basqarmasynyń baspasóz qyzmetinen alynǵan málimetke qaraǵanda, saǵat 11.24-te atalmysh mektepten úsh oqýshynyń ózin jaisyz sezingeni týraly habar túsken.
Saǵat 11.30-da jedel járdemniń alǵashqy brigadasy oqiǵa ornyna jetken. Keiin oǵan qosa 4 brigada shyǵyp, oblystyq kópbeiindi balalar aýrýhanasyna taǵy 12 oqýshyny jetkizgen. Bir muǵalim qalalyq kópbeiindi aýrýhanaǵa túsken.
Baspasóz hatshysy Ainagúl Saqposynovanyń sózine qaraǵanda, zardap shekkenderdiń barlyǵyna belgisiz himiialyq zattan jeńil dárejede ýlanǵan degen diagnoz qoiylǵan. Olardyń tynyshtyǵy men kóp suiyqtyq ishýi qamtamasyz etildi. Barlyq 15 oqýshy birneshe saǵat boiy dárigerler baqylaýynda boldy. Sodan keiin olardyń jaǵdaiy qanaǵattanarlyq kúige jetip, densaýlyǵyna qaýip tónbegen soń, úilerine qaitaryla bastady.
Jeńil dárejede ýlanýǵa qosa bul jaǵdai janyna jaisyz tigen muǵalimdi ýaqytsha aýrýhanaǵa jatqyzý týraly sheshim qabyldandy.
BQO ishki ister departamenti baspasóz qyzmetiniń málimeti boiynsha oqýshylardyń ýlanǵany jóninde shamamen saǵat 11.53-te habar túsken. Sol boida oqiǵa ornyna jedel tergeý toby jiberilgen.
Qazirgi kezde oqiǵanyń mán-jaiy anyqtalý ústinde.
Eske sala keteiik, budan buryn atalmysh mektepte gazdyń iisinen birneshe oqýshynyń jedel járdem qyzmetine júgingenin jazǵan bolatynbyz.
