Oralda biýdjet qarjysyn jymqyrǵan qalaǵa qarasty Jelaev aýyldyq okrýgi ákimi apparaty qarjy-ekonomika bóliminiń basshysy G.Habýlova sottaldy, dep habarlaidy "Ult aqparat".
BQO boiynsha ekonomikalyq tergeý departamentinen túsken málimetke qaraǵanda, G.Habýlova 2013-2019 jyldary býhgalterlik qujatqa atalǵan memlekettik mekemeniń sharýashylyq jáne qarjylyq qyzmeti týraly kórineý jalǵan málimetter engizgen.
Atap aitqanda, «Kaznacheistvo klient» aqparattyq júiesinde óziniń elektrondy qoltańbasyn paidalana otyryp, kartochkalyq shotyna eńbek demalysy jáne emdik járdemaqy túrindegi qarajatty negizsiz aýdarǵan. Sóitip ol memleketke 11 mln 473,149 myń teńge zalal keltirgen.
Zalal tolyqtai óndirildi.
G.Habýlova Oral qalalyq sotynyń úkimimen QR QK 189-baby 4-bóligi 2-tarmaǵyna (senip tapsyrylǵan bóten múlikti iemdený nemese talan-tarajǵa salý) sáikes aiypty dep tanylyp, múlkin tárkileýsiz eki jylǵa bas bostandyǵynan aiyryldy.
