Politseiler oraldyq kásipker Erkin Muhanǵalievti óltirdi degen kúdiktilerdiń ustalý sáti túsirilgen videony jariialady, - dep habarlaidy "Ult aqparat" Tengrinews.kz agenttigine silteme jasap.
Kadrlarda úi aýlasynda eki er adamnyń qoldary kisendelip, jerde jatqanyn kórýge bolady. Olardyń qasynda politsiia arnaiy bólimshesiniń birneshe qyzmetkeri tur. Keiin kúdiktilerdi arnaiy kólikpen alyp ketedi.
Eske salaiyq, oqiǵa 6 tamyzda keshke bolǵan. Erkin Muhanǵalievtiń máiiti P.Atoian atyndaǵy stadion turaǵynan tabylǵan edi. Sonymen qatar kásipkerge kafede shabýyl jasalǵany anyqtaldy. Keiinirek kúdiktilerdiń jeke basy anyqtaldy, olar - kisi óltirgennen keiin oqiǵa ornynan qashyp ketken 31 jastaǵy Rýslan Qojantaev pen 21 jastaǵy Turlan Amangeldi.
Politseiler Oraldan shyǵatyn jáne qalaǵa kiretin joldardy, kúdiktiler barýy múmkin degen jerlerdi teksergen. Qylmyskerlerdi ustaýǵa kúsh qurylymdary jumyldyrylǵan.
Artynsha oraldyq kásipkerdi óltirgen sáttiń videosy taraǵan edi. Kadrda kásipkerdiń eki jigitpen dámhanada qalai sóilesip jatqany kórsetilgen. Kenet janjal bastalyp, jigitterdiń biri kásipkerdiń moiyn tusyna pyshaq suǵyp alǵan. Sodan keiin ol taǵy birneshe ret urady. Jaraqat alǵan Muhanǵaliev terezeden shyǵyp úlgeredi, biraq olar qýyp jetip, kóshede taǵy 15 ret pyshaqtaǵan. Kásipker jedel járdem kelgenshe, qaitys bolǵan.
