Oralda 4 maýsymnan bastap birneshe baǵyttaǵy avtobýstyń qozǵalysy toqtatyldy, dep habarlaidy QazAqparat.
Oral qalasy jolaýshylar kóligi jáne avtomobil joldary bólimi jolaýshylar kóligi sektorynyń meńgerýshisi Almas Ahoshevtiń aitýynsha, №3 Melovye gorki – Plodoovoshnoi, №35 Jaiyq ózeni jaǵalaýy – D.Qonaev shaǵynaýdany jáne №10 Bazar – Podhoz baǵyttarynda qatynaityn avtobýstarda sanitarlyq talaptar saqtalmaǵan.
Atalǵan avtobýstarda júrgizýshiler men kondýktorlar betperde men qolǵap kimei jumys istegen. Avtobýs salondaryn dezinfektsiialaý jumystary júrgizilmegen.
Sondai-aq jolaýshylar tarapynan da sanitarlyq talapty saqtamaý jii kezdesedi.
«Mundai jumystar jalǵasady. Bólim mamandary avtobýstardyń sanitarlyq talapqa sáikestigin kún saiyn tekseredi. Eger bul talaptar saqtalmasa, basqa baǵyttaǵy avtobýstar qozǵalysyn da toqtatýǵa deiin tiisti sharalar qabyldanady», dedi A.Ahoshev.
Eske sala keteiik, budan buryn Oralda koronavirýs qaterine bailanysty ortalyq saiabaqtyń qaita jabylǵanyn jazǵan bolatynbyz.
Sondai-aq búgin birqatar óńirdiń ákimdikterine sanitarlyq-epidemiologiialyq talaptardy kúsheitý tapsyryldy.
Batys Qazaqstanda sońǵy tirkelgen 22 naýqastyń 16-sy – buryn koronavirýs juqtyrǵandarmen bailanysta bolǵandar. Al 6 adamnan profilaktikalyq maqsatta synama alynǵan.
Osylaisha óńirde aýyrǵandar sany 754-ke jetip, sonyń 327-si jazylyp shyqty.
