Oralda 2 million dollarǵa salynǵan muz alańy jaramsyz bolyp shyqty, - dep habarlaidy Elitar.kz.
Osynyń kesirinen jergilikti sportshylar jasandy muz aidynyn tolyq paidalana almaǵan. Óitkeni kún jylynsa da, alańnyń muzyn eritpei, qatyryp turatyn tońazytqyshtyń kabeli jińishke bolyp shyǵypty. Kezinde osy jasandy muz alańyn 2 million dollarǵa salyp bergen merdiger nege ekeni belgisiz, jińishke kabel júrgizgen. Al alyp tońazytqyshtaǵy joǵary kerneýdi mundai álsiz kabel kótere almaidy. Osynyń saldarynan muz alańyn qatyratyn úsh tońazytqyshty qatar qosqan kezde kabel tokty kótere almai jarylyp ketken.
Sport salasy sheneýnikteriniń eskertýinen keiin merdiger qatesin túzetýge tyrysqan. Bir qyzyǵy, burynǵy jeliniń ornyna dál sondai jińishke kabeldi qaita júrgizipti. Endi sport mektebi maqtaýly syrǵanaqtyń muzyn qatyratyn tońazytqyshtardyń bárin paidalana almai otyr. Óitkeni bul kabel de jarylyp, tońazytqyshtardy órtep jibere me dep qaýiptenedi. Endi sheneýnikter bul iske kimdi kinálaitynyn bilmei otyr. Sebebi qarjy únemdep, jumyrtqadan jún qyryqqan kásipkerdiń ózi 1,5 milliard teńge biýdjet qarjysyn jymqyrǵany úshin isti bolyp, túrmede otyr. Amaly taýsylǵan mamandar kezinde osy qondyrǵylardy ornatyp bergen máskeýlik kompaniiaǵa hat jazyp, kómek surapty.
- Negizi tońazytqyshtyń úsheýi de jumys istep tur. Kádimgi konditsionerge freon quiatynyndai, bularǵa da muz qatyratyn túrli himiialyq qospa quiý kerek. Biraq kabeldi iske qosýǵa shynymyzdy aitsaq, qaýiptenip otyrmyz. Óitkeni kezinde merdiger kabeldi jańasyna aýystyrdyq dedi. Biraq órtengen kabeldiń ornyna dál sondai sym júrgizgen. Bul qondyrǵylardyń joǵary kerneýde jumys isteitinin eskersek, jańa kabeldiń jarylǵany azdai, tońazytqyshtyń isten shyǵýy múmkin. Sondyqtan biylǵy maýsymda tońazytqyshtardy kezek-kezek qosyp amaldap shyqtyq. Mysaly, áýeli bireýin qosamyz. Negizi bir qondyrǵy at shaptyrym aýmaqtyń muzyn qatyra almaidy. Tońazytqysh qyzǵan kezde kelesisin qosamyz, sodan keiin úshinshisin paidalanamyz. Al úsheýin qatar qosýǵa kabel shydamaidy, - deidi BQO Joǵary sporttyq sheberlik mektebiniń direktory Ashat Shaihiev.
Sheneýnikter maqtaýyn asyrǵan jasandy muz aidynynyń qurylysyna Batys Qazaqstan oblysyndaǵy Qarashyǵanaq kenishin igerip jatqan sheteldik kompaniialardyń investitsiia retinde quiǵan 2 million dollary jumsalǵan. Jospar boiynsha kún 10 gradýsqa jylynsa da, alańdaǵy úsh tońazytqysh muzdy eritpei, qatyryp turýy tiis edi. Osylaisha kóktemde de konki tebemiz dep qýanǵan oraldyqtar muz aidynynyń qyzyǵyn aqyry kóre almady.
