ورالدا 2 ميلليون دوللارعا سالىنعان مۇز الاڭى جارامسىز بولىپ شىقتى, - دەپ حابارلايدى Elitar.kz.
وسىنىڭ كەسٸرٸنەن جەرگٸلٸكتٸ سپورتشىلار جاساندى مۇز ايدىنىن تولىق پايدالانا الماعان. ٶيتكەنٸ كٷن جىلىنسا دا, الاڭنىڭ مۇزىن ەرٸتپەي, قاتىرىپ تۇراتىن توڭازىتقىشتىڭ كابەلٸ جٸڭٸشكە بولىپ شىعىپتى. كەزٸندە وسى جاساندى مۇز الاڭىن 2 ميلليون دوللارعا سالىپ بەرگەن مەردٸگەر نەگە ەكەنٸ بەلگٸسٸز, جٸڭٸشكە كابەل جٷرگٸزگەن. ال الىپ توڭازىتقىشتاعى جوعارى كەرنەۋدٸ مۇنداي ەلسٸز كابەل كٶتەرە المايدى. وسىنىڭ سالدارىنان مۇز الاڭىن قاتىراتىن ٷش توڭازىتقىشتى قاتار قوسقان كەزدە كابەل توكتى كٶتەرە الماي جارىلىپ كەتكەن.
سپورت سالاسى شەنەۋنٸكتەرٸنٸڭ ەسكەرتۋٸنەن كەيٸن مەردٸگەر قاتەسٸن تٷزەتۋگە تىرىسقان. بٸر قىزىعى, بۇرىنعى جەلٸنٸڭ ورنىنا دەل سونداي جٸڭٸشكە كابەلدٸ قايتا جٷرگٸزٸپتٸ. ەندٸ سپورت مەكتەبٸ ماقتاۋلى سىرعاناقتىڭ مۇزىن قاتىراتىن توڭازىتقىشتاردىڭ بەرٸن پايدالانا الماي وتىر. ٶيتكەنٸ بۇل كابەل دە جارىلىپ, توڭازىتقىشتاردى ٶرتەپ جٸبەرە مە دەپ قاۋٸپتەنەدٸ. ەندٸ شەنەۋنٸكتەر بۇل ٸسكە كٸمدٸ كٸنەلايتىنىن بٸلمەي وتىر. سەبەبٸ قارجى ٷنەمدەپ, جۇمىرتقادان جٷن قىرىققان كەسٸپكەردٸڭ ٶزٸ 1,5 ميلليارد تەڭگە بيۋدجەت قارجىسىن جىمقىرعانى ٷشٸن ٸستٸ بولىپ, تٷرمەدە وتىر. امالى تاۋسىلعان ماماندار كەزٸندە وسى قوندىرعىلاردى ورناتىپ بەرگەن مەسكەۋلٸك كومپانيياعا حات جازىپ, كٶمەك سۇراپتى.
- نەگٸزٸ توڭازىتقىشتىڭ ٷشەۋٸ دە جۇمىس ٸستەپ تۇر. كەدٸمگٸ كونديتسيونەرگە فرەون قۇياتىنىنداي, بۇلارعا دا مۇز قاتىراتىن تٷرلٸ حيمييالىق قوسپا قۇيۋ كەرەك. بٸراق كابەلدٸ ٸسكە قوسۋعا شىنىمىزدى ايتساق, قاۋٸپتەنٸپ وتىرمىز. ٶيتكەنٸ كەزٸندە مەردٸگەر كابەلدٸ جاڭاسىنا اۋىستىردىق دەدٸ. بٸراق ٶرتەنگەن كابەلدٸڭ ورنىنا دەل سونداي سىم جٷرگٸزگەن. بۇل قوندىرعىلاردىڭ جوعارى كەرنەۋدە جۇمىس ٸستەيتٸنٸن ەسكەرسەك, جاڭا كابەلدٸڭ جارىلعانى ازداي, توڭازىتقىشتىڭ ٸستەن شىعۋى مٷمكٸن. سوندىقتان بيىلعى ماۋسىمدا توڭازىتقىشتاردى كەزەك-كەزەك قوسىپ امالداپ شىقتىق. مىسالى, ەۋەلٸ بٸرەۋٸن قوسامىز. نەگٸزٸ بٸر قوندىرعى ات شاپتىرىم اۋماقتىڭ مۇزىن قاتىرا المايدى. توڭازىتقىش قىزعان كەزدە كەلەسٸسٸن قوسامىز, سودان كەيٸن ٷشٸنشٸسٸن پايدالانامىز. ال ٷشەۋٸن قاتار قوسۋعا كابەل شىدامايدى, - دەيدٸ بقو جوعارى سپورتتىق شەبەرلٸك مەكتەبٸنٸڭ ديرەكتورى اسحات شايحيەۆ.
شەنەۋنٸكتەر ماقتاۋىن اسىرعان جاساندى مۇز ايدىنىنىڭ قۇرىلىسىنا باتىس قازاقستان وبلىسىنداعى قاراشىعاناق كەنٸشٸن يگەرٸپ جاتقان شەتەلدٸك كومپانييالاردىڭ ينۆەستيتسييا رەتٸندە قۇيعان 2 ميلليون دوللارى جۇمسالعان. جوسپار بويىنشا كٷن 10 گرادۋسقا جىلىنسا دا, الاڭداعى ٷش توڭازىتقىش مۇزدى ەرٸتپەي, قاتىرىپ تۇرۋى تيٸس ەدٸ. وسىلايشا كٶكتەمدە دە كونكي تەبەمٸز دەپ قۋانعان ورالدىقتار مۇز ايدىنىنىڭ قىزىعىن اقىرى كٶرە المادى.
