elements.envato
Oralda jasóspirim esik aldyndaǵy átkenshekke minemin dep eki saýsaǵynan aiyrylyp qaldy, dep jazdy Sputnik Qazaqstan agenttigi "Moi gorod" basylymyna silteme jasap.
Qaiǵyly oqiǵa 27 shilde kúni bolǵan. Zardap shekken 13-tegi jasóspirimniń anasy sol kúni uly dostarymen balalar alańyna oinaýǵa ketkenin aitty.
"Biraz ýaqyttan keiin ulymnyń telefonynan onyń dosy habarlasyp, alańǵa kelýimdi ótindi. Ol balam saýsaqtarynan aiyrylǵanyn aitty. Alańǵa qalai jetkenimdi de bilmeimin. Nikitany kórdim. Qarasam, jerde saýsaǵynyń bóligi jatyr. Dirildep, esimdi áreń jidym", - deidi balanyń anasy Qarlyǵash.
Jedel járdemge habarlasa almaǵannan keiin jasóspirimniń ákesi ony oblystyq aýrýhanaǵa ózi aparǵan. Biraq ol jerde ony qabyldamai, balalar aýrýhanasyna jibergen. Oblystyq aýrýhanada Qarlyǵashtyń joldasy dárigerlerden ulynyń jarasyn óńdep berýdi talap etken. Sodan keiin baryp qana Nikitany balalar aýrýhanasyna aparǵan. Ol jerde onyń saýsaqtaryna ampýtatsiia jasaýǵa týra keldi.
Saldarynan Nikita oń qolynyń eki saýsaǵynan aiyryldy. Nikitanyń ózi jaraqatty qalai alǵany esinde joq ekenin jetkizdi. Jattyǵýǵa arnalǵan qurylǵymen ainalyp, bir orynda toqtap turǵysy kelgen, sol kezde saýsaǵynan aiyrylǵan.
Anasynyń aitýynsha, uly áli del-sal kúide jáne alǵan jaraqatynan uialady. Nikitanyń jasy qazir ótpeli kezeńde. Odan bólek alańdaǵy uldar endi áskerge jaramaitynyn aitqan. Ulym bolsa saýsaqsyz qalai ómir súretinin ýaiymdap júr. Ol áskeri qyzmetker bolýdy armandaǵan. Onyń ústine ol bokspen ainalysady. Buǵan deiin balalar alańynda eki ret osyndai jaǵdai boldy, biraq onda jaraqaty asa qaýipti bolmaǵan. Bul qashanǵy jalǵasa bermek? Jaqynda bir balanyń ústine fýtbol qaqpasy qulap, qaitys boldy. Kelesi kúni bizdiń alańǵa da kelip, týra sondai oiyn qaqpasyn jóndep ketti. Bizde qaiǵyly oqiǵa bolǵanda ǵana birdeńe jasai bastaidy", – dedi Nikitanyń anasy.
Batys Qazaqstan oblysy politsiia departamentiniń baspasóz qyzmeti atalǵan fakti tirkelgenin jetkizdi. Qazirgi ýaqytta Qylmystyq kodekstiń 306-baby – "Qaýipsizdik talaptaryna sai kelmeitin taýarlardy shyǵarý nemese satý, jumystardy oryndaý ne qyzmetterdi kórsetý" boiynsha sotqa deiinshi tergeý jumystary bastaldy.
Qaiǵyly oqiǵaǵa qaramastan, qaýipti attraktsiondy oiyn alańynan alyp tastaýǵa eshkim asyǵyp jatqan joq. Oral ákimdigi balalar alańy kimniń balansynda tirkelgenin keiinirek habarlaýǵa ýáde etti.
